註冊 登入



打印

[遊記分享] 北海道札幌/函館/富良野/小樽8日7夜旅行(2019年6月)

北海道札幌/函館/富良野/小樽8日7夜旅行(2019年6月) E-mail 此主題給朋友

[隱藏]
今次8日7夜北海道之旅會去晒札幌、函館、小樽同富良野,主要以食野同睇景點為主。



[航班]
20190616 9:15AM HX690 HKG -> CTS

[第一日]
本來因為早機,所以打算唔去貴賓室,但係早到咗機場差唔多一個鐘,所以就是但食個早餐先!而家8:50am先跑去閘口,真係好攰。


坐左差唔多5個鐘,3:00pm着陸,香港航空的飛機餐味道正常,但係個經濟座位真係好硬,坐得有少少辛苦。出完海關,就先去換張JR 3日pass,係Klook買大概1150一張(Klook: https://www.klook.com/activity/2787 )
提示:拎飛個陣要決定埋係幾時開始用,拎完飛,仲可以預約埋指定席,咁就包保會有位坐。

新千歲機場行出黎都幾靚,有多啦A夢同好多熊公仔。
出札幌我決定坐JR,普通位1070円一張,指定席大概貴500円,而時間方面,4:00pm、4:15pm同4:30pm都有車,所以可以就番時間決定坐邊架JR。
落車第一站先去Sapporo Stella Place行街食野,JR站5號出口,一出直行一陣就見到,之後上六樓係佢地的餐廳層,好多各式各樣嘅日本食品,而我本身就打算去食根室花,點知五點幾都由好多人排隊,睇黎應該要等半個鐘或以上,最後差唔多等左一個鐘先有得入去食,主要排隊嘅有八成都係日本人,得兩成係遊客。食完我除左覺得個北寄貝麻麻地之外,其他都水準之上,尤其是左口魚同穴子,由於夜晚會去食北海道的湯咖喱,所以只係食左6成飽。埋單1500円一個人,值得推薦。(4.5分)


行左陣Stella Place就出發去酒店。酒店住係大通公園隔離的Sapporo View Hotel,價錢幾抵,兩晚2人房加埋都係950蚊,雖然間房樓底比較矮同埋有d暗,唔會免費提供樽裝水外,但張床都舒服,性價比幾高。


坐左陣,之後就行大概20分鐘去狸小路,其實同東京大板差唔多,都係藥品店、夾公仔機等等,唯一唔同係條街有好多酒店,但其實狸小路d舖頭大概10:00pm就會關門,所以住得近都無咩用。


其實狸小路都只係配角,Soup Curry Garaku先係重點,係Google有過千個reviews同高評分,見到咁多人排隊,希望唔好令我失望!今次排左45分鐘,叫左一個雞腿湯咖哩同豬肉片湯咖哩。味道有別於一般偏甜的咖哩,所以可能係日本比較少試到,但作為一個香港人,佢只不過係稀d的港式咖哩,如果要等10-20分鐘都可以接受,但45分鐘就唔係太抵等。講番野食,我會比較鍾意豬肉片,因為日本豬同大陸豬味道上係有一定分別;飯量可以簡100克、200克同300克,男士建議簡300克;辣度可以簡3/5。整體食物有3.5分。


Soup Curry Garaku餐牌:


食完睇狸小路都行咗一陣藥妝店同埋買咗個可麗餅食(不過大家可以唔洗試,因為唔好食),之後就返酒店休息了。

[ 本帖最後由 Mr.J先生 於 2019-7-21 10:08 AM 編輯 ]



熱賣及精選
[第二日]
間酒店的隔音唔錯,床都幾好訓。9:30am就起身,但天氣都係麻麻地,溫度都只有11-13度


執野都執左大半個鐘,最後10:30am出門去大通公園,睇個時鐘塔,咁岩呢段時間個公園無特別活動,所以都無咩好行。之後就去埋個鐘樓,個到有義工幫手影相👍🏼


之後就去食米之蓮一星法國餐Moliere,雖然有少少遠,係円山公園同北海道神宮附近,但係坐無虛席係有原因的!我叫左佢地8200円的北海道套餐,味道唔錯,特別係鵝肝,如果覺得太油,可以配搭無限供應的法包,都好好食。而且用餐環境一流,成餐大概要食2個鐘,最早可以11:30am開始。如果有興趣,可以預訂。
Moliere餐廳網站:https://sapporo-moliere.com


之後就行左去円山公園同北海道神宮,好大風同凍。睇完就去札幌場外市場,打算去食蟹,點知根室已經收左舖,無得食!😭只好拍照留念⋯⋯有無師兄師姐去過可以話我知呢間抵唔抵食?


離開咗場外市場之後,就去咗白之戀人工廠都打算睇點樣製作白之戀人,但係咁啱佢哋個朱古力廠維修當中,所以暫停開放,只係開放左公園部份,公園種咗好多玫瑰花,所以會聞到好香嘅花香味,如果天氣好影相一流,所以我覺得值得去。喺2樓有一間咖啡室,可以俾你坐低買雪糕食,但係我就唔推薦我試咗嘅期間限定士多啤梨雪糕,因為個士多啤梨好酸,價錢係750円。


之後就去返札幌站嗰邊去行商場,諗住買返幾件衫,但係我發覺好似冇咩品牌同埋唔係好啱香港嘅style,所以咩都買無買。晚餐就去咗食撒賴燒肉,大概8:30去到大概8:30去到,等左差唔多一個鐘,埋單每個人大概2600円到,一盤肉大概1000円到,大概200克一盤,就係得少少羊未,唔係太so,所以我覺得幾好食,特別係佢包埋啲洋蔥都好甜,同埋我覺得佢幾嘅韓國泡菜都幾好食,所以如果大家想食可以五點幾六點先去排隊,咁就慳返好多時間。


[ 本帖最後由 Mr.J先生 於 2019-6-18 09:08 AM 編輯 ]



[第三日]
一早6:00am就起身,因為要趕住6:53am去搭JR去函館,由於一早換左指定席,所以去番相應車卡,上網睇番一程去函的JR都要8000幾円,所以如果要去函館,買JR Pass會抵d。


係八雲站去森站中間有幾段路可以好近咁見到一望無際的海,同埋一坐好似馬鞍山的山,如果大家鍾意海,可以留意番。


第一站就去函館朝市去食個元氣早餐先,行左一轉駅二市場,見到打卡景點-釣魷魚,但應該食唔飽,就去左隔離的橫丁食早餐。簡左間最多人的餐廳就入左去。叫左個函館丼(2500円)同五色丼(1700円),海膽同三文魚子都唔錯,但係帶子同三文魚都麻麻地但係呢間已經係最多人食架喇... 唔係好對得住個價錢。




食完就行左陣函館朝市,然後就去左元町公園,但係其實只係一個好細的公園,所以唔係好值得去,因為我連相都無照到。之後就去左食大家推薦的小丑漢堡,要咗個套餐(680円),包括一個炸雞漢堡、芝士肉醬薯條同埋一杯凍烏龍茶,整體我覺得唔錯,有4分,但係由於個雞即叫即炸,所以等嘅時間會有啲奈。


下一站去左金森赤倉庫,都幾適合影相,一邊係翻新左嘅商舖,好多林林總總嘅嘢,例如有玻璃製品、衫同餐廳,附近仲有一間明治宮,專賣玻璃製品,以佢嘅外牆係滿滿嘅綠葉植物,都幾靚,打卡一流。


然後就返左酒店休息一陣,大概傍晚時間就去咗函館山度睇百萬夜景,坐纜車上去來回1280円,如果想纜車上得前,記得去車尾位置,咁當纜車向山上開嘅時候就會見到函館成個城市嘅景色,夜晚大概等到7:30之後天就會開始黑,燈亦都會開始慢慢亮起,溫度有啲凍,所以最好帶定披肩上去。


喺上面大概等到八點左右我哋就落返山啦,費事陣間好多人一齊落生日有排等。落完山就去咗大門橫丁個頭去食拉麵,我哋去咗一間叫做龍鳳拉麵嘅小餐廳,嚟到北海道梗係要試吓佢哋嘅鹽味拉麵(750円)同味增拉麵(800円),由於有啲肚餓所以叫多咗一碟餃子(400円)。鹽味拉麵會有雞油係上面,所以如果大家唔鍾意太油膩的話,可以試吓佢哋嘅味噌拉麵,有少少懶懶地,佢哋嘅面算叫做比較粗身同埋彈牙,所以我覺得幾好食,餃子嘅話大家唔肚餓就可以唔使叫啦,整體都有4分。


食完之後,就去咗便利店買咗個甜品同埋一盒函館牛奶去完結今日的行程。


[ 本帖最後由 Mr.J先生 於 2019-6-18 09:21 PM 編輯 ]



[第四日]
今日函館天氣好好,我大概9:30起身,本身打算去食村上海膽,因為六月啱啱好過咗禁捕期,理論上海膽係最好食嘅,但係點知佢逢星期三休息,所以摸門釘,之後就是但揀左一間有得食蟹腳嘅餐廳坐低左,叫咗花咲蟹(1800円)、一隻蟹腳(2500円)同埋一條魷魚(780円),我覺得花咲蟹可能都係食返啱啱煮熟會好食啲,因為我覺得凍食一般。


食完搭2/5號電車去五函郭公園,車費230円一位,展望塔嘅門票要900円,跟住落地下買咗五陵角公園四季景色嘅明信片,一張108円,都幾抵。


中午食飯就作對的彩食鹽味拉麵,750円,個湯好清,我會更加鍾意呢間的湯底,個麵偏幼身,彈牙,整體唔錯。對面就係小丑漢堡,如果冇喺函館其他地方食,可以黎依度食都得。


之後坐車返酒店拎行李,我買咗嗰夕張密瓜(4000円)同青提(4500円),然後就聲去搭1:53pm班JR去札幌啦。唔知有無買貴到提子原來要放多兩三日先好甜,我買完第二日就開始分批食,食到第六日先開始甜.....


到左札幌就先去酒店放低行李,之後就去左食朝早係函館食唔到的村上海膽,由於6點就去食,所以唔洗排隊。叫左個海膽丼(6150円),呢種海膽每年6月至8月先有,海膽好creamy,加少少豉油成個海膽味就好出;仲有叫左海膽蛋捲(1080円)、芝士焗海膽(1000円)同雜錦天婦羅海膽(2700円),熱的海膽的味道更出,但係個天婦羅偏貴🙈


食完就衝左去Sapppro Factory去行街,但係d舖8點就關門,但我衝到去都已經7:30pm,所以行得半個鐘,最後都買到少少野😊但係個商場有一層進行緊翻新,預計2019年冬天先開番,所以有興趣的版友可以留意。買完就去左商場B1食Dipper Dan可麗餅,呢間野好好好好食,同好抵,所有口味都係330円,我見到有人一次過買四個外賣拎走,就知有幾好味。


[ 本帖最後由 Mr.J先生 於 2019-6-21 01:42 PM 編輯 ]



回覆 引用 TOP

[隱藏]
[第五日]
今日係3日JR Pass的最後一日,好好利用埋佢去富田農場,一早先去札幌JR站7號月台搭7:49am的JR去旭川。買左個便當做早餐,不過不失啦。坐左差唔多1.5小時就到旭川。之後去二號月台轉車去美馬牛/中富良野(本身打算去晒四季彩之丘同埋富田農場,但因為下午落雨,所以改左行程)


便當入面有四種海鮮,三文魚子最好食,1080円一盒,一試無防。(3.5分)


一出中富良野駅就轉左,路上有路標指示點去富田農場,行大概25分鐘就會到。入到去當然就係瘋狂打卡啦,買野夠5400円可以退稅,係入口的右手邊第二間舖,點解我會知,因為我唔少心四夠左5400円😂呢到名信片好平,50円一張,但係我覺得函館的名信片靚d🥴


係富田農場打完卡,就可以去對面食哈密瓜,我覺得大家可以唔洗試沙冰,因為係藥水味,而哈密瓜就可以試下,300円一片/800円半個,又或者可以原個買走。


之後就開始落雨,所以提前番旭川食拉麵,呢間青葉拉麵我覺得好好食,醬油拉麵(750円)有4.6分,味噌拉麵(850円)有4.2分。留意番,佢地6:50pm就關門,而有好多小店(包括:甜品店)都係6-7點關門。題外話:老闆的媽媽好熱情,佢有本簿比外國人寫comment😳

去左超市都行,買左白色草莓,麻麻地.......我終於明白到日本人對咖哩的執著@@之後再去左旭川站隔離的Aeon行街,地下比較多餐廳,一樓就係賣衫,我唔小心又買左野,不過呢到大部分都無得退稅


之後搭8:00pm的JR番札幌了,我三日以來,如果每程JR都分開買飛,費用大概26000円,但3 day pass只需大概1150港幣,大家可以參考下。聽人講,入面的薰衣草番梘好好用,等我用完再話比大家知用後感。

[ 本帖最後由 Mr.J先生 於 2019-6-29 11:27 AM 編輯 ]



回覆 引用 TOP

[第六日]
今日出發去小樽,由於車費一位640円,所以當初買JR Pass就決定買三日,而唔買四/五日,但由於要自己買飛,所以唔係好識買,但佢有得直接簡短途車票,然後直接簡要比的車費,好彩係去車站途中查左一程要比幾多錢,所以就好快買完。


由於唔係指定座,所以只可以去自由座車廂,由於我哋上車嘅時候所有位都已經俾人坐咗啦,所以我哋唯有企,但係車程其實只係需要大概35分鐘,所以企一陣就到。你車程去到嘅時候,右手邊會見到海,所以想影大海嘅相嘅話就留意右手邊。

一出車站,轉向左手邊直行就係三角市場,入面有兩間餐廳比較多人,分別係味處武田同瀧波食堂。之後因為見到味全武田好似多啲人食,所以就入咗去,叫咗一個海膽三文魚子丼同埋八角刺身,首先先講個丼,飯底偏淋,好似加多左太多水去煮,所以唔好食;三文魚子新鮮,但係唔夠味道;海膽唔錯幾好食(2.5分)。八角魚刺身係我第一次食,除咗魚身比較淋滑之外,冇咩魚味,我覺得試一次就夠(2.5分)。跟餐有個面試湯,入面有新鮮小元貝,好飲(4.5分)。


食完飯,本身打算食隻生蠔之後先走,點知全個三角市場都只可以BBQ,所以我就無試到。之後就出函去小樽運河,行過去大概15-20分鐘左右,途中可以去埋參觀手宮線跡地,係個到見到好多學生影相。小樽運河係每個旅行團都一定會黎的,所以要把握時間影靚相。


影完相同埋慢行成條小樽運河後,就去左行堺町通,呢條街就係小樽的手信街,會見到各種令你有購買衝動的商舖,包括:LeTao、北菓樓同埋六花亭。LeTao的本店二樓有間cafe,可以去個到食下午茶,最低消費為每人一件蛋糕或飲品,大家可以試佢地的經典芝士蛋糕set,真係有令人感動的感覺。(4.8分)

而北菓樓,大家一定一定一定要買以下的限定產品,佢有蘋果的清香,但又清爽而不過甜,令人食完都無咩罪惡感。大推!(5.0分)


去到堺町通的盡頭,就會見到小樽另一個打卡位,就係定時會有音樂的鐘,咁岩我去個日維修緊,所以無得記錄低佢噴蒸氣的情況。佢後面就係賣音樂盒為主的手信店。


晚餐就去左食和樂,由於5點左右就去左,所以唔洗排隊,餐廳好大而出面仲有個幾靚的庭園,食物質素不過不失,但係穴子就唔好食(1.5分),可以唔洗試,價錢合理。(3.5分)


之後再去欣賞埋小樽運河的黃昏景色,之後就番札幌去買野行街了。
提示:小樽運河有個公共洗手間,如非必要,千萬唔好去,因為好臭。


[ 本帖最後由 Mr.J先生 於 2019-6-27 12:04 AM 編輯 ]



回覆 引用 TOP

[第七日]
今日落左一日雨,好彩大部分的景點都係前幾日去左,今日主要係行街食野。第一站先去二條市場,我覺得呢到d野普遍黎講抵過其他市場(水果同海鮮),所以大家其實可以先黎呢到。第一餐先去好多人推薦的大磯,除左價錢之外,食物質素好好,本身打算叫個丼同埋一隻毛蟹黎食,個餐牌上面毛蟹嘅標價係7500円,但個職員之後話要睇一睇,之後同我報價話要9000円,所以最尾我就冇叫到,就咁叫咗一個花咲蟹海膽三文魚子丼(3380円),三種魚生都好好味(4.6分)!好味過函館朝市。


之後就行左去狸小路行街,順便消化下個早餐,狸小路都無咩野買,行完就番左去二條市場食毛蟹同帶子,兩樣都好鮮甜,值得推薦!(5分)朝早早間個間大磯都會黎呢間野拎貨,就知有保證。



待續...

[ 本帖最後由 Mr.J先生 於 2019-7-9 11:26 PM 編輯 ]



[第八日]
由於係搭下午飛機,所以最後一日就安排左去離機場10-15分鐘的outlet買野。Outlet營業時間由10點開始,而無札幌坐特快JR去大概30分鐘,所以大家可以安排下時間。Outlet可以夠行4-5個鐘。

[ 本帖最後由 Mr.J先生 於 2019-7-9 11:32 PM 編輯 ]



回覆 引用 TOP

雖然同大家分享行程上的點滴好開心,又有唔少板友比左意見我,但係最後三日的行程比較豐富,所以無咩事後影相同寫分享

如果大家覺得呢篇遊記有參考價值,請大家支持下我🙈等我知道我的分享係有人睇的

[ 本帖最後由 Mr.J先生 於 2019-6-22 08:53 PM 編輯 ]



回覆 引用 TOP

[隱藏]
Support Mr. J


回覆 引用 TOP

十卜


回覆 引用 TOP

支持J 先生,可以去函館食小丑🤡漢堡和浸溫泉♨️


引用:
原帖由 Greentea2016 於 2019-6-16 07:03 AM 發表

支持J 先生,可以去函館食小丑🤡漢堡和浸溫泉♨️
會去食小丑漢堡呀👍🏼有無邊個口味推介?



回覆 引用 TOP

晚上會很凍嗎?


[隱藏]
去小樽L字頭間餅屋食泡芙。😍😍😍😍


回覆 引用 TOP

 提示:支持鍵盤翻頁 ←左 右→
[按此隱藏 Google 建議的相符內容]




重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。