打印

[遊記分享] 9天烏克蘭基輔 + 3日2夜切爾諾貝爾核電廠 + 1日真槍實彈射擊 (更新#2#3) 香討焦點

9天烏克蘭基輔 + 3日2夜切爾諾貝爾核電廠 + 1日真槍實彈射擊 (更新#2#3) E-mail 此主題給朋友

[隱藏]
又好耐冇見大家啦!上次個遊記完全爛尾,希望今次可以一次過分享俾大家!!


話說2018年9月19-27日去咗烏克蘭。
大家都知我係情迷俄羅斯,所以我今次嘅飛行路線都係幾痴線下架。

飛機 - 俄羅斯航空 Aeroflot Russian Airline
官網直接買由香港飛明斯克,中途莫斯科轉機

SU213 11:35 - 香港 - 莫斯科 (到達當日16:35)
SU1834 22:00 - 莫斯科 - 明斯克 (白羅斯) (到達當晚23:30)
B2843 (白羅斯航空 Belavia) 20/9 08:25 - 明斯克 (白羅斯) - 基輔 (烏克蘭) (到達當日09:25) (機票另買)

首先香港飛莫斯科係落Terminal F,所以香港唔會出2張boarding pass。一到埗最好快啲排隊,因為實在太多人,同埋唔駛填入境紙,因為過關時會出電腦入境紙,關員會印入境開你本passport。之後拎行李,過Terminal D唔駛坐巴士,行過去都係15分鐘左右。記得如果考慮呢條線,莫斯科飛明斯克果程機最好揀我呢個時間,因為時間啱啱好,可以食個簡單晚餐都仲有時間。

過到去Terminal D,俄羅斯係將莫斯科飛明斯克果程機當做international flight。寄行李時,我個位地勤唔係好似香港去白羅斯係免簽證14日,佢都有打電話上office問清楚,但係都好快脆出boarding pass比我,寄好行李後,再做入境手續,呢個時候好多人都會問關員會唔會收走張電腦入境紙(因為過到去明斯克其實係domestic果邊落機,係無passport control),而家俄羅斯嘅關員好醒目,佢哋部電腦睇到你係下一程去邊,所以佢直接比返張電腦入境紙我,之後再喺我passport印出境。當然你擔心嘅話,你可以問多句。

到咗明斯克後,由於係落Minsk International Airport 2,所以一落機行幾步就可以拎行李(記住係冇passport control)。我下一班機係第二日嘅朝早8點Terminal 1,但係因為老貓燒鬚,所以嗰晚只可以喺長櫈度瞓(其實都有最近嘅酒店,不過我費事煩)。入境時,網上好多人話莫斯科飛明斯克只係比當地人用,因為由於無passport control關係,所以好多人為免有麻煩,寧願飛其他地方。而我親身試驗過,無任何問題,記得預先做定online checkin,關員收走我張電腦入境紙,再喺我本passport印入境,過程順利。

最後到達基輔,比較多人排隊,見到其他國家過關時都要比手指模,但竟然到我時,只係望下我個樣,就給印比我走。

出到去,我第一時間去搵咗錢先,(一出到去arrivals嘅左手邊就見到),冇乜特別理會個價位,不過同我睇返個rate分別唔大。換完錢就行前少少見到3個電訊counter擺埋一齊,你哋可以格下價先買,3間分別係Kyivstar,Vodafone,Life,有d人話kyivstar好,所以我買咗一張可以用一個月嘅無限上網,無記錯好似係290UAH,即係80蚊港紙。(×係嚟我覺得我應該係買貴咗)



就係呢張。。。不過呢張有個唔好處,就係偏遠地方係收唔到 (好似我入chernobyl基本上收唔到乜滯)

我今次喺基輔住Hotel ibis Kiev Railway Station,2018年3月1號先開張,附近就係中央火車站。如果喺機場,可以直接坐巴士,會喺中央火車站落,非常方便。不過今次我叫uber,機場坐去酒店係376.71UAH,即係大約100蚊港紙。車程係50分鐘左右。其實喺烏克蘭坐uber價錢都真係幾抵坐,當然有朋友一齊share就仲平。



酒店front desk嘅staff大部分識講英文,房間新淨,正常大,不過房內無洗頭水,牙擦呢d供應。附近有KFC,麥當勞,Novus大型超級市場,當地烏克蘭餐廳Puzata Hata (幾好食架,又平),商場等等。當然,去景點係少少遠,但由於烏克蘭物價平,所以坐uber係非常之平。地鐵都係2蚊雞。


中央火車站 (×火車站內有d舖頭仔可以行下,同埋有間找換店)


Novus超級市場,入面乜嘢都有得買,可樂1公升17UAH (5蚊港紙)


Puzata Hata係烏克蘭當地餐廳,自助形式,要食咩自己拎或者同staff講,1杯嘢飲,2個dishes,1個沙律都係100UAH (27蚊左右)

下一個post講Chernobyl Tour (一定唔會爛尾)

[ 本帖最後由 krasnodar 於 2019-7-19 12:51 AM 編輯 ]



очень приятно познакомиться!!!!!!!
由於到埗第二日就開始切爾諾貝爾核電廠行程,所以第一日主要都係喺酒店附近行下,去咗Novus超市買洗頭水同埋少少食物。因為中間會有2日唔住酒店,都唔敢買太多嘢。第二朝7點就要集合,我大概6點左右起身,尋晚執好晒嘢入營,拎埋個行李去reception叫佢哋幫我keep好,食完個早餐就慢慢行去集合地點 (呢個亦係我選擇住Kiev IBIS嘅其中原因,貪集合地方喺酒店前面。)

我今次join嘅tour係chernobyl-tour(.com),如無記錯3日2夜加埋早餐,午餐,晚餐,2晚酒店同埋租radiometer盛惠400幾美金左右。
我個group有8個人,分別嚟自俄羅斯、烏克蘭、意大利、英國、加拿大、澳洲同埋我香港。我哋嘅導遊係Nataly,當日會收埋尾數先開始行程,由於切爾諾貝爾近白俄羅斯邊境,所以車程都需要預2個鐘頭左右。

入去切爾諾貝爾核電廠記得帶passport,網站guideline一早吩咐我哋要著長袖衫同埋長褲,唔可以著涼鞋。喺門口見到我哋tour公司有紀念品賣,不過時間唔多,所以搞好晒入去嘅資料就上返車。我哋先去禁區外嘅商店買少少嘢飲同埋食物,就即刻開始行程。

第一日行程相當緊密,會先參觀禁區外嘅地方。


喺呢度導遊俾我哋落車影相,都係大家打卡嘅地方。


聽聞話係以前有信收就會放入去後面嘅信箱,但係唔知係比邊個用?


有個福島紀念碑喺度


無記錯入面係栗子嚟,有冇人會拎返去整嚟食?


以前蘇聯時期,呢度係叫列寧格勒核電廠,後尾改咗叫切爾諾貝爾,所以會有列寧像


禁區外嘅爛屋


聖伊利亞基督教堂 St Ilya orthodox Christian church


普里皮亞特 (Pripyat)河岸上有兩隻廢棄放射性船同輪船嘅河港
附近泥土及環境嘅輻射量係0.31μSv (微西弗),部機持續係咁響


第一批犧牲嘅消防員紀念碑


1986年核爆炸後,就係呢啲機械人幫手清理,仍然都有輻射


廢棄嘅Kopachi村 (магазин - 商店)


Dytyatky檢查站


廢棄籃球場


廢棄電影院售票處 (Касса - 售票處)


廢棄嘅學校


好恐怖嘅公仔,仲要咁樣擺


老是常出現既經典鋼琴

待續。。。。。(太多相)

[ 本帖最後由 krasnodar 於 2019-7-15 07:09 PM 編輯 ]



очень приятно познакомиться!!!!!!!
第一日其實好密集式咁去唔同地方參觀,幾乎係冇停過。如果你哋決定要join 3日2夜,我建議你哋一定要著一對非常舒服同埋行山(可以行泥地)嘅鞋,因為我可以好肯定咁講,係由朝早行到黃昏先去食晚飯。

我哋因為係細tour(3日2夜一般唔會超過10人),所以去到某d想睇嘅地方,我哋都會有足夠時間影相、探索。加上因為有部份建築物已經唔安全,所以唔可以入去,但係好多時導遊Nataly都會盡量比我哋入去睇一陣,通常佢會叫我哋細聲d,費事比人知道。

禁區外其實冇乜太多特別嘢睇,所以第一日我哋已經開始入去Pripyat城,架車車到我哋去某一個集合點就比我哋落車,之後我哋一路就跟住導遊Nataly行,小路,叢林,樹林,鑽嚟鑽去,天氣又熱,仲要著住長袖衫,真係攰到死咁滯。留意返,切爾諾貝爾核電廠係無廁所,所以要去一定要早d同導遊講,導遊都會叫我哋買定濕紙巾同紙巾傍身。

未入Pripyat前,去咗近距離睇Duga-1 rader (Russian Woodpecker)
真係好鬼死大同高。








指定打卡動作,Pripyat入口處,導遊比我哋落車影相 - 正式進入Pripyat


入去時要經過檢查站,有時要落車比passport軍人睇,有時唔駛


導遊好細心咁show昔日果度地方嘅原貌,下圖就係33年後嘅今時


而家變得非常荒蕪,樹木生長得相當茂盛


已經再無人住嘅荒廢公寓,外牆其實唔係咁殘舊


以前生仔嘅椅?


呢部應該只係一部水機我估,上面見到вода (water)


竟然可以睇到咁靚嘅玻璃畫,試問仲可以捱到幾多年後?


上面嘅裝飾完好無缺 - Kinoteatr "rometey"


同果時1986年或之前分別唔大


Hotel Polissia


Palace of Culture Energetik


餐廳


超級市場

全日基本上係咁行,我行行下都要拉高個衫袖,已經唔理會唔會有問題 熱到痴肺,主要係有d可以比得我哋去睇嘅地方都係差唔多範圍,所以唔會特登開車過去。少d體力都唔掂呀!

重點即將出場 - Pripyat Amusement Park (Парк розваг Прип'ять)-將會下次繼續 (第一日都仲未完喎)

[ 本帖最後由 krasnodar 於 2019-7-19 12:50 AM 編輯 ]



очень приятно познакомиться!!!!!!!

回覆 引用 TOP

留位


очень приятно познакомиться!!!!!!!

回覆 引用 TOP

[隱藏]
引用:
原帖由 krasnodar 於 2019-7-15 05:56 PM 發表

由於到埗第二日就開始切爾諾貝爾核電廠行程,所以第一日主要都係喺酒店附近行下,去咗Novus超市買洗頭水同埋少少食物。因為中間會有2日唔住酒店,都唔敢買太多嘢。第二朝7點就要集合,我大概6點左右起身,尋晚執好晒嘢入營,拎埋個行李去reception叫佢哋幫我keep好,食完個早餐就慢慢行去集合地點 (呢個亦係我選擇住Kiev IBIS嘅其中原因,貪集合地方喺酒店前面。)

我今次join嘅tou ...
支持一吓先.



引用:
原帖由 mnaa6525 於 2019-7-15 07:36 PM 發表



支持一吓先.
多謝曬!



очень приятно познакомиться!!!!!!!

回覆 引用 TOP

等 ....


回覆 引用 TOP

好正,啲相


回覆 引用 TOP

引用:
原帖由 krasnodar 於 2019-7-15 05:56 PM 發表

1986年核爆炸後,就係呢啲機械人幫手清理,仍然都有輻射 ...
你嗰位導遊真係搵命搏



[隱藏]
最新資料:


現在由香港坐俄航去明斯克,同一個 PNR 購買的機票,已經可以直掛行李到明斯克,不用取行李再寄倉。


登機證在香港也會出 HKG>SVO, SVO>MSQ 兩張。


但香港地勤人員也講明,去到莫斯科先要做入境手續,再做出境手續。


如果直接由國際轉機通道過,會唔會被人攔?唔知,同埋你咁樣過法,你唔會有俄羅斯嗰張入境紙。



引用:
原帖由 gojeu 於 2019-7-16 09:29 AM 發表




你嗰位導遊真係搵命搏
果度係室外地方,應該唔會有咩問題😅



очень приятно познакомиться!!!!!!!
引用:
原帖由 蘇皮蛋撻 於 2019-7-16 09:52 AM 發表

最新資料:


現在由香港坐俄航去明斯克,同一個 PNR 購買的機票,已經可以直掛行李到明斯克,不用取行李再寄倉。


登機證在香港也會出 HKG>SVO, SVO>MSQ 兩張。


但香港地勤人員也講明,去到莫斯科先要做入境手續,再做出境手續。


如果直接由國際轉機通道過,會唔會被人攔?唔知,同埋你咁樣過法,你唔會有俄羅斯嗰張入境紙。 ...
咁好?唔同terminal都可以直掛?



очень приятно познакомиться!!!!!!!
引用:
原帖由 krasnodar 於 2019-7-16 09:56 AM 發表


果度係室外地方,應該唔會有咩問題😅
只係純估計,應該仲有微量輻射洩漏,空氣之中有幾多?所以你哋要著長衫長褲唔可以著涼鞋



引用:
原帖由 krasnodar 於 2019-7-16 09:58 AM 發表


咁好?唔同terminal都可以直掛?
其實你搭俄航轉機去歐洲,大部份都唔未必係同一個 Terminal 轉機,好少會係 F 轉番 F,大部份都係要轉 D 同 E。

唔好話國際線轉國際線,依家連 F 轉 B 的國內線,最多人去嘅聖彼得堡,香港都係有直掛到聖彼得堡。

香港一樣會出兩程登機證。

轉國內線就算無直掛,都會出兩程登機證,入到境拎完行李,你去到嗰邊嘅 Terminal 用 bag drop counter 都可以寄到行李。

都係唔使再 Check in。

除非你啲機票係分開買,第一程買到去莫斯科,莫斯科再飛係另外買,否則都會出兩程登機證畀你。



[隱藏]
引用:
原帖由 蘇皮蛋撻 於 2019-7-16 10:08 AM 發表



其實你搭俄航轉機去歐洲,大部份都唔未必係同一個 Terminal 轉機,好少會係 F 轉番 F,大部份都係要轉 D 同 E。

唔好話國際線轉國際線,依家連 F 轉 B 的國內線,最多人去嘅聖彼得堡,香港都係有直掛到聖彼得堡。

香港一樣會出兩程登機證。

轉國內線就算無直掛,都會出兩程登機證,入到境拎完行李,你去到嗰邊嘅 Terminal 用 bag drop counter ...
我係香港買到明斯克,冇諗過短短半年多已經唔同左。有時好睇佢地點處理,我之前飛Sakhalin 要去Vladivostok 轉機都要拎行李再check in



очень приятно познакомиться!!!!!!!

回覆 引用 TOP

 提示:支持鍵盤翻頁 ←左 右→
[按此隱藏 Google 建議的相符內容]






重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。