打印

[遊記分享] (已完成)第一次自駕遊俾咗沖繩(此乃文字敘述式沉悶遊記, 慎入) 香討焦點

(已完成)第一次自駕遊俾咗沖繩(此乃文字敘述式沉悶遊記, 慎入) E-mail 此主題給朋友

[隱藏]
喺今次沖繩快閃之旅之前, 我從未試過在外地揸車。我一直認為, 駕駛汽車於一個陌生嘅環境, 唔熟路亦唔熟悉當地交通規則, 是一件非常之危險的事。

開頭計劃行程嘅時候, 我係打算以單車作為交通工具。出發前五日我爆響口, 向同事透露咗個計劃之後, 有三位曾經去過沖繩嘅同事聯合起嚟, 用夾雜咗大量粗言穢語嘅說話, 苦口婆心咁勸導我一定要租車。

將佢地話中嘅助語詞過濾掉後, 其實佢地嘅說話重點不外乎得幾個-
1. 當地路闊, 交通唔繁忙, 路面車輛極疏落。當地司機守規則, 不爬頭, 不超速。(安全)
2. 租車好平, 入油又平, 好多地方泊車唔駛錢。(經濟抵玩)
3. 有GPS導航, 不會迷路, 可以去多好多景點。(慳時間)
4. 踩單車踩到身水身汗, 死下死下咁, 唔好喺車度嘆下冷氣? (佢哋不了解單車遊嘅浪漫與樂趣, 對單車遊存有偏見~~~呢點可以不理)

佢哋嘅勸導相當有說服力, 作為一個自認明事理講道理嘅人, 我當然有參考佢地意見。我作最壞打算, 即使自駕容易程度不似預期, 我都可以只揸一轉機場去住宿地點及一轉由住宿地點往機場。如果到時發覺單車遊唔可行, 都可以以自駕遊作為後備方案。於是我上網租咗架車。

睇到呢度, 有部份讀者(如果有的話)可能已經按捺不住, 對住個顯示屏爆粗:"XXXX, 開場白寫到水蛇春咁長, 死唔斷氣, 口水多過浪花..." Ok, 廢話我講到呢度, 入正題。



[ 本帖最後由 虛偽有罪 於 2019-11-24 08:45 PM 編輯 ]



熱賣及精選
Day 1


十一月某日早機出發, 到達那霸機場接近中午時份。排隊等候過關入境嘅旅客多到不堪, 由離開機艙到步進機場大堂, 足足用咗45分鐘。

同租車公司職員接洽後, 佢指示我去巴士站等接駁巴士。暴晒之下企咗15分鐘, 終於有車到。我事前冇睇地圖, 見取車地點--"臨空豐崎營業所(那霸機場)" 個名括住那霸機場, 一心以為就喺機場附近。點知又係一場不美麗的誤會。我見架巴士行極都未到, 開map睇。嘩, 原來個營業所距離機場6.5km, 加上架巴士行得好慢, 用咗20分鐘左右至去到營業所。



因為出發前上網睇咗事前流程介紹, 所以基本上唔駛點排隊, 直接埋counter俾錢。個職員同我講我book咗嘅note已經冇晒貨, 所以免費upgrade俾部corolla我。我拒絕。佢問明原因後, 搵另一個職員過黎, 兩個"吱吱浸浸"一輪之後, 就問我aqua收唔收貨。呢次我點頭。跟手佢俾張景點列表我, 話我知喺度買景點入場卷有discount。由於我臨時轉自駕遊, 行程有變未決定好將會去邊, 所以冇幫襯。慳錢再一次與我無緣。


出到外面攞車, 由一位典型韓國人面孔嘅男職員招呼我, 及後佢自我介紹原來佢真係韓國人。韓國我去過一次, 對當地韓國男性印象麻麻, 不過做人唔應該一竹篙打晒成船人嘅。我對呢位男職員印象非常之好。友善之餘亦非常有耐性。我聽同事講, check車要check得好仔細, 如果唔係會俾人屈錢㗎。所以我真係check咗好耐。呢位泡菜男, 一直保持笑容, 沒有流露出絲毫不耐煩。

驗車完畢, 我坐上車, 佢拎張ETC card插落card機, 部機有盞紅燈著咗。原來咁樣代表read唔到張card。泡菜男褪返card出黎, 呵一口氣喺card, 用手指捽兩下, 再插返入card機。呢次着綠燈, 即係得咗。

我較好seat位同所有鏡之後, 就試下用部GPS導航。我以為係入地址或目的地名。
錯! 泡菜男話我知要先網上search目的地嘅mapcode, 再輸入果組數字入導航。
https://japanmapcode.com/en



泡菜男可能見我手忙腳亂, 不知所措咁, 就打開車門, 彎身將上半身伸入車廂幫我輸入guest house嘅mapcode。跟手仲set埋language做英文。其時我係有擔心車外嘅人見到我哋嘅舉動, 會誤會我地進行緊不道德的交易。為避免過程中我唔覺意嘴到佢, 所以我挨身向副駕駛座。
終於搞掂晒, 我坐返直, 同泡菜仔講聲"沙喲lala"後, 就向guest house進發。



沖繩嘅交通狀況係咪好似我班同事所講咁樣? 我觀察到嘅同我預期有好大出入。實際上路面行駛嘅車都唔少, 雖然未遇過有塞車嘅情況, 但交通都算繁忙。

冇車爬頭? 冇車超速? 講笑咩! 我初黎報到, 嚴守交通規則, 例如時速限制80km/hr, 我只會踩到75km/hr於慢線行駛, 在快線嘅車"fee fee"聲係咁過。跟我後面嘅車亦一架一架咁抽出快線爬我頭, 唔駛幾耐就消失於我視線範圍。我承認自己喺熟習環境之後, 亦都有愈揸愈快。

GPS導航大致準確, 指令清晰, 而且有預令俾我有足夠時間轉線。問題係佢個安全提示over咗, 去到煩膠嘅程度。可能我手車同拓海仲有少少距離, 以下幾句對白, 我都聽咗唔少次:
Over speed detected, pls drive safely
Sharp turn detected, pls drive safely
Sudden deceleration detected, pls drive safely

再加上導航用女聲語音發聲, 佢令我聯想起以前一個經常批評我手車嘅朋友。該名朋友曾經因為我車住佢期間, 於將軍澳出某個迴旋處行錯路口, 而鬧足我半個鐘。(我在下個路口圈頭返回正確路口, 只不過令車程增加三分鐘咋, 冇陰公)

首次在外地駕駛, 開頭心情相當緊張。佢講埋d同導航無關嘅說話, 我忍唔住開口叫佢"收聲咪L嘈"。





我租住嘅guest house喺位於字宮城(唔係子宮)嘅一間兩層高房屋。地下果層係屋主自己嘅居所, 客房在二樓。


間屋位處於一條窄巷旁邊, 屋個泊位亦唔算闊落。當我泊車期間, 屋主連同佢兩個朋友由屋走出黎。唔知個位真係太窄定抑或我手車真係咁屎, 喺屋主睇位協助之下, 我扭咗N手軚至入到泊位。我落車時發現司機位果邊貼牆太埋開唔到門, 我又唔想再郁車, 唯有狼狽地爬去副駕果邊開門落車。
  

由於我住果兩晚guest house得我一個住客, 所以屋主直接問我係咪Mr. X。 確認咗我嘅租客身份之後, 佢就'庄'下部Aqua。
跟手就問我:"你女朋友喺邊?"
我答佢:"我冇女喎"
佢地幾條友隨即喪笑, 現場一片歡樂氣氛。
我心諗:"單身貴族/單身狗好好笑咩?"

有讀者可能會問:"你有冇出言還擊以悍衛單身人士嘅尊嚴呀?" 我當然冇咁做啦, 人哋笑下都唔俾, 你估我真係CLS嘅咩, 。佢哋明顯冇惡意, 所以我只係一直陪笑, 直至我义開話題為止。

[ 本帖最後由 虛偽有罪 於 2019-11-19 01:31 AM 編輯 ]



回覆 引用 TOP

[隱藏]
簡單交談之後得知屋主係一名混血兒。佢老豆係菲律賓人, 亞媽係女人之餘亦係沖繩人, 嗜好係打麻雀同釣魚。我估佢五六十歲左右。當佢得知我係香港人, 佢眉頭一鄒, 話佢半年前嚟過香港, 覺得香港係一個好有趣好好玩嘅地方, 最近睇新聞見到嘅香港同佢所去過嘅香港好似唔係同一個地方, 問香港發生咗咩事, 家下咩嘢情況。

太複雜嘅問題我唔識答, 我只能溫馨提示佢香港依家好危險, 叫佢千祈唔好去。佢話有個朋友家下喺香港, 佢好擔心。

佢有幾部單車喺泊車位後面, 我向佢確認咗邊部可以借用之後, 就同佢行上二樓。


一開客房門, 見到有三張床, 但係我book果間係單人房喎。佢話:"間房你用晒, 門匙交俾你, 你鍾意訓晒咁多張床都得。


佢話聽晚搵我飲酒嘅時候再傾過。(呢個約會最終並沒有實現, 可能因為我太夜返)佢收下房租就退出房間。之後喺呢段旅程期間, 我再冇見過佢。



一個人喺房開始諗跟住去邊個景點參觀。為咗向同事證明單車遊沖繩係可行, 我決定搵個適合踩單車前往嘅景點。我隨手翻開帶嚟日本嘅旅遊書, 去到介紹万座毛果頁。本書話喺万座毛睇日落係嚟沖繩嘅遊客其中一個指定行程喎。我開map睇, 万座毛距離我現在嘅位置20幾km。我心諗:"啱L晒, 踩單車過去時間剛剛好"(事後我當然知道呢個諗法是弱智的)

落樓攞部單車, 睇真d, 發現部車同我所預期嘅有好大落差。冇變速, 車身多處地方生銹, seat位即使較到最高都只係小童單車嘅高度(有可能部車真係小童單車)。不過唔理得咁多了, 照計劃行事, 出車向北進發。


[ 本帖最後由 虛偽有罪 於 2019-11-19 08:12 PM 編輯 ]



在宮城海岸停一停, 觀賞下海景。


經過砂辺馬場公園, 行入去見到好幾個西人, 疑似係美軍軍人。園內有個籃球場同㵦滑梯。呢種滑梯我心儀已久, 想試好耐了。不過當時有大量小朋友排緊隊, 我見條人龍一個大人都冇。面皮再厚都唔敢去排隊了。轉而去籃球場, 到咗有兩個㗎小朋友果半邊場黐波射。佢地好客氣, 不斷傳個波俾我。


同㗎小朋友道別後, 過咗隔離個海灘砂辺ビーチ。好靚, 可惜最後冇喺呢個灘游過水。



回覆 引用 TOP

由於當時位置好近美軍空軍基地, 我行行下見到軍機降落。


經過野国貝塚群, 行去海邊睇咗陣。


自從早上在香港機場食咗餐M記之後, 我一直冇嘢落過肚。此行途中見到好多吸引嘅食肆, 不過為咗趕及睇日落, 我冇入任何一間幫襯。我只係入咗Lawson, 買咗兩串串燒及一支乳酸飲料頂住先。


唔知同部單車性能有冇關係, 總之我覺得沖繩真係唔適合單車遊。起碼我行呢個路段唔適合。踩馬路就多車, 危險兼阻住地球轉。踩行人路就凳到籮柚痛, 事關大多行人路路面都係凹凸不平。而且有太多上斜落斜嘅路段。

我行下停下, 睇下map, 進度比預期落後好多。我算一算時間, 肯定冇可能日落前到達万座毛了。我降低要求, 去殘波岬。反正兩個景點都係崖, 對差不多先生嚟講冇分別。


搏晒老命咁踩, 終於抵達殘波岬。


[ 本帖最後由 虛偽有罪 於 2019-11-19 08:15 PM 編輯 ]



回覆 引用 TOP

殘波岬呢個名真係好應景。我到達時真係成個人殘晒。皇天不負有心人, 我總算見到整個咸蛋黃。當時佢同水平線仲有些少距離。我開心得有點忘形, 埋去雪糕車買咗杯紅芋味雪糕, 消費500円, 同老闆傾咗兩句。



咸蛋黃走得比我預期快, 我轉身想影佢時, 咸蛋黃已經消失咗。


喺殘波岬公園行咗陣


轉頭去咗殘波浜, 喺石上坐咗陣。



[ 本帖最後由 虛偽有罪 於 2019-11-19 12:48 AM 編輯 ]



回覆 引用 TOP

[隱藏]
行返上馬路, 見到架流動餐車。我幫襯咗杯蘋果味smoothie, 消費500円, 坐喺旁邊嘅長凳上飲。期間老闆行出黎, 將一舊啡啡哋嘅麵包用牙籤拮住交俾我。食落甜甜哋, 因為佢係加咗黑糖製造嘅麵包。


經過御菓子御殿堂読本店。想話買羊羹, 唔見有。於是食咗個紅芋味嘅撻形物體, 2百幾円。呢個幾好味。




我食果個係需要雪藏的版本, 唔知放喺常溫果個版本係咪一樣味道。


行過family mart,

買返罐沖繩啤酒解渴。唔, 的確係好飲過垃圾級啤酒x冰。我覺得個罐幾靚。


[ 本帖最後由 虛偽有罪 於 2019-11-19 01:00 AM 編輯 ]



回覆 引用 TOP

酒後忽然胡思亂想:"嚟咗大半日都只係去得一個景點, 豈不是間接承認單車遊沖繩係唔可行?" 於是我開map睇下有冇仍然開放中的景點。原來就喺我附近就有個座喜味城跡係24小時開放。



入到城跡公園, 黑到伸手不見五指。我勉強行到城跡樓梯口, 猶豫咗陣。最終都係唔敢上去掉頭走。



回覆 引用 TOP

途經一座外型特殊嘅建築物。


開map睇下, 方知道呢座係電台嚟。電台附近周圍並沒有其他建築物。時候都唔早了, 唔容許我再蕩失路。為咗確定前往字宮城嘅正確方向, 我向兩名由電台步出前往停車場嘅男子問路。其中一個戴眼鏡嘅中年男子, 非常熱心, 非常熱情, 仲好似非常鍾意握手。佢一直掛住一副笑口噬噬嘅真摯笑容, 我覺得佢一定係個內心充滿喜樂嘅人。

一埋牙, 佢就伸手出嚟示意嚟個握手先, 又問我點稱呼。我心諗:"問路都要講名同握手都係第一次" 我有求於人, 當然有求必應,有問必答啦。點知佢有更多問題喺後面, 包括"你來自邊度?"呢條必答題, "你踩單車去邊?" "點解你會嚟咗電台呢樹?"

當佢知道我由字宮城踩咗去殘波岬之後, 佢面露一個浮誇嘅讚嘆表情:"好遠路程喎" 然後對我直豎拇指。我努力壓抑住內心嘅驕傲, 扮晒謙虛咁話:"艱苦旅程, 我差d都捱唔住" 跟住佢笑得更開懷了。

得到所需指引, 我向佢哋道別。佢再度伸手出嚟要求握手。完成握手禮, 我踩單車離開, 聽到佢喺我身後大嗌:"good luck"。



回覆 引用 TOP

支持師兄又出遊記分享👏👏👏


雖然只係快閃, 但我出發前都有做下功課, 對沖繩地道食物都有些少認識。 有三種食物我希望可以在今次旅程中品嚐到-
1. 石垣牛
2. 海葡萄
3. 沖繩麵

由殘波岬返字宮城途中經過唔少食肆。可惜當中嘅食肆並沒有提供出售上述嘅食物。


經過間燒肉店, 入去問有冇石垣牛。職員擰晒頭, 我就行返出店外。我茫茫然望住條街, 見到好多舖都收咗工了。實在太肚餓, 開始降低要求兼自己呃自己:"咪又係牛, 我又唔係食神, 食唔出分別嘅"
於是又入返燒肉店。

[ 本帖最後由 虛偽有罪 於 2019-11-19 08:19 PM 編輯 ]



回覆 引用 TOP

[隱藏]
女職員指住餐牌, 上面有四個不同價格嘅套餐。日文字我睇唔明, 但圖我都仲識睇。見有個餐有牛又有海鮮, 就決定要呢個餐。跟手佢又指住牛舌張圖, 我本身鍾意食牛舌, 見只係俾多4百幾円, 就要埋。

一坐低, 女職員指住枱面上部平板, 叫我"order food"。我不以為意, 因為我一直以為係set dinner, 所以一心坐喺度等食。隔無耐, 女職員又過黎, 又指住部平板, 我就出聲話:"我咪已經order個餐囉" 佢叫我等等, 轉頭嚟咗個貌似南亞裔嘅男職員用英文講解。原來唔係set dinner, 係任叫任食燒烤! 而我點咗嘅餐, 係除咗酒之外, order任何嘢都唔駛加錢的。




[ 本帖最後由 虛偽有罪 於 2019-11-19 09:27 PM 編輯 ]



回覆 引用 TOP

 提示:支持鍵盤翻頁 ←左 右→
[按此隱藏 Google 建議的相符內容]






重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Rights Reserved.
版權所有,不得轉載。