[按此打開]
[隱藏]
早五六年，我搬出去自己住，父母就想重新裝修間屋，之後搵咗個熟人嚟裝修，原本都係啲小手工問題，都冇乜所謂，點知一耐咗就出現好多問題。
一︰電線
呢個係最近個問題，都係聽返維修個師傅講返，唔知點解個廚房條路線會同一半廳個路線係同一條，同一條之餘，仲要係用幼一半嘅線去做，一來條線根本負荷唔到個電量，五六年之後成條融斷，都係要搵師傅上嚟用粗電線再穿過。
仲有廁所個條線又係奇奇怪怪，廁所兩個合要長期用電，一個係抽風，一個係燈，唔知點解兩條線係開一個開關，開抽風就一定要開燈……呢個師傅都話搞唔掂。
二︰入牆插座
之前有指明邊啲位會有電器，基本上都畫好晒圖紙比佢照做，成品出到嚟，唔係高咗就低咗，一係就係啲奇奇怪怪嘅位置多個插座……例如床頭下面有個插座，而個插座係一定會被張床頂住……
仲有廚房抽油煙出口位有個插座……一係唔用，一係就成個電制都係油……
三︰抽氣扇
又係廁所同廚房，個抽氣扇唔係用香港嘢，係用大陸嘢，香港買到嘅抽氣扇唔係大一吋就係細一吋，想換都換唔到……
四︰天花
唔夠三年就已經有龜裂，呢年仲開始甩，呢個都係正常情況，不過太快太嚴重。
五︰地磚唔齊
我都知地磚冇可能啱啱好，但係唔知點解個切割位會放係當眼位置，一般嚟講唔係應該係啲邊位角力位，可以比家俬擋住嘅話度乜？？
六︰浴室去水位
呢個又係，個去水位好易塞，個師傅話唔知點解用咗細管，好易比頭髮阻住，而且唔係一條直管去大渠，一塞就好難搞……
