• 瀏覽: 122,128
  • 回覆: 606
  • 追帖: 109
[隱藏]
我後生嗰陣有一段時間失業,之後好辛苦至喺便利店揾到份夜更做住先。為咗方便返工,就喺附近揾咗間板間房住住先。當時我係住喺深水埗嘅東x大廈,嗰陣大廈仲係用緊手拉閘嘅電梯,我諗年紀輕啲嘅都未必見過。環境唔算好好,因為當時橦大廈好殘舊,走廊就算喺日頭都好暗,但叫做有瓦遮頭,真係見識到乜嘢係馬死都要落地行。

記得有日日頭我喺天台晾衫,晾咗一陣,就見到有個女仔眼定定好似夢遊咁行咗上嚟天台。佢行得好慢好慢但就一直行去天台邊。初時我自己做自己嘢,都冇理佢,諗住快快手晾埋啲衫就食啲嘢休息一陣又要去返工。點知我見佢越行越出好似有啲唔對路,就叫住佢:「小姐!你係咪喺度住㗎?」

[ 本帖最後由 default2046 於 2021-8-26 01:54 PM 編輯 ]



熱賣及精選
我叫咗佢幾聲佢都係冇反應,眼見佢越行越出天台邊,突然意識到佢唔知係咪想跳樓,我就一手捉住佢隻手,諗住扯佢返埋嚟再講。點知佢好似好大力,仲係一步一步咁行緊出去。當時我雖然有諗到抱起佢(因為個女仔睇起嚟都係得一百磅咁上下),但係嗰陣個天台得佢同我兩個人,一陣佢叫非禮我就水洗都唔清,所以我唯有大叫:「小姐,有乜事坐低慢慢講啦!你想做乜嘢呀?喂!有冇人幫手呀?」

由見到個女仔上嚟天台去到呢刻我諗都唔夠兩分鐘,但係我就好似返咗一日工咁成頭大汗,隻手仲feel到就嚟冇力再拉住佢。



嗰陣個女仔離天台個駁位都係得兩個身位咁上下,當時我都有少少懷疑佢可能遇到唔乾淨嘅嘢(老實講呢橦大廈有好多傳聞),當時我眼尾睇到喺度晾緊嘅衫,一手就扯咗條孖煙通落嚟,唔理咁多即刻兜頭冚咗上個女仔頭上面!

就喺嗰下我就已經feel到個女仔隻手由之前拉都拉唔郁變到好似冇晒力咁,一扯就成個人比我扯咗埋嚟。由於實在太突然,佢一嘢撞埋嚟差啲連我都跌埋落地。當時我一隻手仲係捉住佢,另一隻手就扶住佢條腰想幫佢坐喺地下休息一下先。點知佢一坐低,個女仔個頭就已經向後跌,嚇得我即刻兩隻手捉住佢膊頭穩住佢個身,否則跌到後腦就可大可小。

由於個女仔個頭仲係比我條孖煙通冚住咗,喺呢個時候我至意識到佢可能暈咗(唔係臭暈咗,因為條孖煙通係已經洗好咗乾淨嘅)。我即刻幫佢拎返條孖煙通落嚟,見到佢兩眼緊閉,真係好似不省人事咁。



支持下先


[隱藏]
 
留名, 等聽故


食丸仔食到神智不清
好心報警捉佢睇醫生啦
盞害死佢



直至呢一刻,我先至正面望真個女仔個樣:大約二十歲上下、瓜子口面、短髮(有啲似依家ViuTV嗰個Kathy仔)、皮膚唔係好白但嘴唇偏薄,同埋好似冇乜血色。我有試過搖佢膊頭、用手拍下佢塊面想叫醒佢,但係佢都係冇反應。嗰陣時嘅我都算係喺人生低潮,腦海中忽然浮現如果個女仔就咁瓜咗,我可能就比人懷疑係殺人兇手(雖然當年冇咁多cam,應該冇人知道我用孖煙通冚過佢個頭),然後一個唔該入埋冊,咁呢世人就玩完。縱使那時烈日當空,也頓時令我驚出一身冷汗。

無計可施之下,我就好似啲電視劇咁,首先用手指放近個女仔鼻孔下面,好彩仲feel到佢有呼吸,即刻個心定少少先。跟住我有想過同個女仔做人工呼吸,但轉頭心諗一來我唔識,二來依家又唔係浸親做乜嘢人工呼吸先? 但係依家佢不省人事,如果放佢喺地下再揾人求救又好似唔係幾好(當年冇手提電話㗎嘛),一陣佢起身然後跳咗落去我就會好內疚。嗰一刻真係人生交差點,基本上點做都死咁…

[ 本帖最後由 default2046 於 2021-8-26 04:50 PM 編輯 ]



等更


幸好我記得我婆婆教過我,如果有人暈倒,按佢嘅人中係有機會可以令嗰個人醒返嘅。喺依家呢個無其他選擇嘅情況下,我唯有試下呢招傳統方法。我先用左手扶住個女仔條腰,將佢個頭挨喺我膊頭上面,然後提起自己右手手指公,就按咗落去佢人中度。初時我都唔敢太大力按下去,驚整痛佢,但見按咗幾下佢都好似冇乜反應,我把心一橫,就唔理三七廿一係咁大力按落去。

都唔知按咗幾多下,跟住我膊頭終於feel到個女仔郁一郁。我當堂即刻鬆咗一口氣,拍下佢塊面,見佢眼皮跳咗幾下,然後個女仔就突然睜大咗隻眼望住我。當時我哋兩個人對望咗唔夠一秒,就同時「嘩」一隻叫咗出嚟!



[隱藏]
 
個故真心唔錯, 樓主加油!


「嘩!你係邊個呀?」
「嘩!你醒啦!」
「呢度係邊度呀?」
「天台囉!你上嚟做乜嘢呀?」
「我幾時有上到嚟呀?」
「啱啱你咪自己行出嚟囉!你上嚟做乜嘢㗎?」
「我冇上嚟㗎,我…我去丟垃圾咋!嘩!你隻手做乜事呀?」

其實由於太突然,從個女仔醒咗嗰一刻起,直至依家我隻左手仲係攬住喺佢條腰度。我突然覺得有啲唔好意思,立即縮返隻手、退後坐返開少少:「小姐!你頭先暈咗呀!我啱啱救返醒你咋!」
「暈咗?我點解會暈㗎?呢度係邊度呀?」
「咪話係天台囉!小姐你係咪住呢度㗎?」
「呢度係邊度呀?」
「東x囉!」
「我住樓下㗎!婆婆叫我拎袋垃圾出去…我唔知點解上咗嚟㗎!」
「………」
「……」
「…」

可能我哋兩個當時真係太激動嘞,雙方終於經過一輪唔知過咗幾耐嘅快問快答之後,情緒至可以慢慢咁平伏下來,慢慢再推敲返事情嘅前因後果…



個女仔話自己叫「霞女」(化名),同婆婆兩個人住喺東x大廈嘅一間板間房(佢冇講住幾多樓,當時我又覺得唔關自己事就冇問)。佢爸爸喺佢好細個就已經過咗身,媽媽早兩年離家出走(我諗佢媽媽一定係改嫁咗啦,但當然唔好意思講出口),屋企經濟都係靠佢媽媽有時拎啲錢返嚟、同婆婆拎啲衫呀膠花呀返屋企加工嚟支撐。霞女依家已經冇返學,日常都係幫婆婆做啲衫呀膠花之類嘅加工工作、同照顧婆婆生活起居,平時好少出街。琴晚婆婆因為唔記得拎袋垃圾出走廊,所以今朝就叫霞女拎袋垃圾去走廊尾(當時東x大廈係冇所謂正式嘅垃圾房,通常啲人如果夜晚冇擺啲垃圾喺門口,其他時間就會就咁推啲垃圾喺走廊尾條樓梯嘅牆角度,夜晚自然會有人收)。霞女淨係記得自己著咗隻拖鞋然後拎住袋垃圾去咗走廊尾,之後嘅事就已經冇晒記憶,唔知點解上咗天台,亦唔知上嚟做乜。

其實我自從嚟呢度住咗一排之後就已經遇過幾件怪事(之後可以再分享),聽完霞女咁講就知道佢一定係撞到啲唔乾淨嘅嘢。我見佢面青唇白咁(但人中位就比我㩒到紅咗一噠),就膽粗粗咁講:「我就住喺呢度樓下(因為頂樓租最平,但夏天真係好熱),你要唔要過嚟坐下定一定驚?如果唔舒服我可以去隔離屋借電話幫你叫救護車㗎。」(當年冇手提電話,而且我亦冇錢喺自己間房裝電話,一般如果有需要都係借隔離屋電話或者去樓下間士多借電話用)

[ 本帖最後由 default2046 於 2021-8-27 02:15 PM 編輯 ]



RIP


引用:
原帖由 default2046 於 2021-8-26 01:53 PM 發表

我後生嗰陣有一段時間失業,之後好辛苦至喺便利店揾到份夜更做住先。為咗方便返工,就喺附近揾咗間板間房住住先。當時我係住喺深水埗嘅東x大廈,嗰陣大廈仲係用緊手拉閘嘅電梯,我諗年紀輕啲嘅都未必見過。環境唔算好好,因為當時橦大廈好殘舊,走廊就算喺日頭都好暗,但叫做有瓦遮頭,真係見識到乜嘢係馬死都要落地行。

記得有日日頭我喺天台晾衫,晾咗一陣,就見到有個女仔眼定定好似夢遊咁行咗上嚟天台。佢行得好慢好慢 ...
果位小姐拎D衫膠花加工+電話唔方便, 你就番緊夜間便利店   

果個年代何來便利店?

又或者, 你遇到的果位小姐, 查實係..........



[隱藏]
 
引用:
原帖由 default2046 於 2021-8-27 02:12 PM 發表

個女仔話自己叫「霞女」(化名),同婆婆兩個人住喺東x大廈嘅一間板間房(佢冇講住幾多樓,當時我又覺得唔關自己事就冇問)。佢爸爸喺佢好細個就已經過咗身,媽媽早兩年離家出走(我諗佢媽媽一定係改嫁咗啦,但當然唔好意思講出口),屋企經濟都係靠佢媽媽有時拎啲錢返嚟、同婆婆拎啲衫呀膠花呀返屋企加工嚟支撐。霞女依家已經冇返學,日常都係幫婆婆做啲衫呀膠花之類嘅加工工作、同照顧婆婆生活起居,平時好少出街。琴晚婆婆因為 ...
請問仲有下回分享嗎?



提示:支持鍵盤翻頁左 右