2022 歐遊見聞：時機、口罩、檢測、熔斷［追加行程、開支］

瀏覽: 1,301
回覆: 4
追帖: 1
分享: 2

+23

列印

chankahon

VIP

帖子: 7281
積分: 9055
註冊: 2006-8-7

發短消息

加為好友

[其他] 2022 歐遊見聞：時機、口罩、檢測、熔斷［追加行程、開支］

#1

發表於 2022-6-22 16:39

剛啱去完歐洲返香港開始隔離，分享少少實務見聞。

【時機】考慮呢段時間去歐洲已經有超過半年時間，主要係因為工作空檔。另一個考慮係香港同歐洲都係剛啱經過Omicron洗禮，初夏期間屬群體免疫力正盛之際，歐洲天氣亦普遍回暖，可以盡量戶外活動同用餐（今次好好彩經常見太陽），而且好多地方都會採取自然通風，呢個時候應該係比較安全。回顧數據，沿途幾個國家五六月疫情都係相對低位，但六月上旬因為有公眾假期，部分地方開始見輕微反彈。不過小弟一路檢測都陰性嘅。

兩米社交距離標示仍然普遍存在但同時被普遍無視。話說丁堅地瀑布都好少人山人海，保持兩米距離根本自然。

訂機票同隔離酒店時為四月中旬，出發時為五月上旬：當時雖然政府已經宣佈隔離縮短至七日，但來回機票仍然有四千幾（包括英國乘客離境稅），隔離酒店選擇都頗多，似乎當時普遍都仍然有睇定啲心態。歐洲航班同酒店已經好爆，本來想郵輪之後加長玩愛爾蘭，但搵下住宿價錢之後就決定放棄，行程中大多較好嘅住宿都係有人取消放出嚟或者全新推出。

今時唔同往日，開放俾非居民入境之後有好多內地居民經香港出入，特別係居住地機場無直飛香港航班嘅內地人，今次來回程坐隔離嘅都係福建人，佢哋經香港同深圳係最正路。另一個時機考慮係歐洲當地機場實在人手不足。因為今次搭兩程郵輪，所以牽涉嘅城際飛機同火車相對少，但都避唔開Gatwick機場嘅人潮。當時用九個字排安檢，比較起嚟唔算係咩（個人記錄都仍然係偉大嘅美國TSA），而且地勤會定時出嚟捉人插隊趕飛機，秩序井然。五六月未算最旺季，七八月情況難料。

事隔三年嘅雙年展。相對於威尼斯人滿為患嘅橫街窄巷（個人認為入城費作用成疑），雙年展場館裡面人流已算好疏落，觀展可安心。記得要去意大利館。

【規劃】前面大部分行程都無特別計算，只係回程選擇停留伊斯坦堡。一來係當地核酸檢測價錢比較可負擔（約HK$120：主要因為俄羅斯仍然需要陰性核酸檢測證明，而土耳其仍然向俄羅斯人打開大門，所以仲有好多檢測選擇），可以做檢測嘅window比較長，而且伊斯坦堡住宿供應充裕，萬一航班被熔斷延長行程唔會太重皮。唯一留意土耳其必須要兌換現金（而且記得任何里拉用剩都會變廢紙）同埋BNO入境土耳其要簽證。

伊斯坦堡不失品質之低成本生存：左圖全素碗飯52里拉（~HK$24，Alpas Coffee & Kitchen），右圖燒雞飯80里拉（~HK$37，Emek Saray Restaurant，新鮮麵包免費）。四年前一里拉換1.5港紙，今日一里拉換0.45港紙，加上整體物價升幅，食材成本本已水漲船高，然後遊客近幾個月湧入，大多數遊客區餐廳都用美金消費力進取定價，食平嘢要行遠啲。

【口罩】南轅北轍。南歐人普遍重視口罩，即使意大利五月已經解除室內大部分口罩令，但超市裡面仍然人人有罩；當地公交口罩令會維持到九月，可以想像口罩意識會維持一段時間，遊客被呼喝「mascherina!」繼續會係搭車之日常。要留意意大利幾乎只視KN95為口罩標準，非常難頂。希臘六月開始同意大利一樣維持公交口罩令。行程亦有去到冰島、愛爾蘭同英國，全部都係完全無口罩令，幾乎只有亞裔人同留學生會堅持戴口罩，另外南歐遊客似乎都傾向會戴口罩。

羅馬街頭的自由呼吸：當發夢都要戴口罩嘅時候，去到一個無口罩嘅世界確實比發夢更虛幻。後來發現本地人通常手上都會綁個罩，室內仍然人人有罩（瀰漫一片「請自重」嘅空氣），做到如圖中奔放自我嘅其實多數係遊客

另一個極端：香港郊野公園都豁免戴口罩，但去到英國Jurassic Coast三號風球咁大風仍然有遊客忠於口罩信仰。喺市區因為經常進出室內外，口罩成日又脫又戴確實唔太好，但郊野地方口罩認真無咩用，尤其咁大風口罩根本好難貼面。

中間落墨，今次主要係按照意大利標準（密閉空間）戴口罩，盡量戶外用餐，全力做好手部衛生。酒精搓手液喺歐洲各地非常常見（尤其南歐同冰島），唔需要自備，洗手間亦一定會有梘液。觀察所見，冰島人即使唔戴罩但普遍衛生意識仍然高，消毒工夫做得好足；英國很麻麻，唔難見到有人隨街吐痰，但搓手液供應尚多。土耳其則已打回原形，口罩令搓手液雙失，要特別謹慎。

飛機搭口罩方面，小弟反而覺得問題不大。機艙換氣量大又涼涼地，戴口罩唔算辛苦（尤其同倫敦地鐵比較），甚至有少少覺得戴口罩長途機其實幾好瞓，可能二氧化碳有催眠效果。飛機口罩令要視乎航空公司政策同相關機場所在地規定，例如五月其時意大利仍然有飛機口罩令，即使歐盟月中取消口罩令之後，五月下旬由威尼斯搭飛機仍然要戴口罩；同理，往來香港航班都要戴口罩。

【檢測】起飛之後前後做咗三次檢測，兩次為郵輪做抗原檢測（羅馬機場 EUR20、雷克雅未克哈帕音樂廳 ISK6980），一次為返香港（某個曾經放klook嘅私營實驗室，大約HK$120）。要留意因為各地陸續取消登機前檢測要求，小弟去到歐洲之時檢測服務供應已經越來越少，唔似得舊年咁周街都有藥房擺檢測帳幕，但因為美國6月12日之前仍然要求登機前做快速測試，所以抗原測試供應當時仲係比較充足。土耳其正如前述，因為俄羅斯客需求殷切，所以反而核酸檢測易搵。

伊斯坦堡化驗診所：化驗室亦有同Welcome Card合作，似乎係比較高調嘅診所，門市位於Taksim地點方便，無須預約、採樣過程迅速。市內有好多街邊旅行社大字標明代售「PCR Test」而非美國要求嘅抗原快測，可見俄羅斯買手非常熱愛土耳其（同貶值比盧布更甚嘅里拉）。當地亦有上門檢測服務，可靠與否要自行判斷，但政府已經唔再要求ISO認證化驗室，到底係一紙文書而已。

檢測服務要網上搵定官網，而且資料好可能未及更新，事前務必直接確認；核酸檢測等候結果時間長，要留意香港係計直接降落香港嗰班機起飛前48小時，如果回程航班涉及轉機，可能需要即日有結果嘅額外收費服務。土耳其航空喺check in同閘口都會查檢測文件，但去到香港機場就唔覺衛生署有人檢查出發前做嘅檢測報告。

【郵輪】搭咗兩程郵輪，主要係要消耗之前預購嘅消費額。郵輪上員工都有戴口罩，客人嘅口罩令實施則主要視乎靠泊港口政策，去到六月地中海應該已經唔再強制戴口罩，但坐船之時（五月）因為意大利同希臘都有口罩令，船員基本上都會勸喻船客戴罩，但實際上吹你唔漲。搭船之時郵輪公司要求登船前72小時取得快速測試證明，又衍生額外成本（冰島核酸抗原檢測同價感覺好鬼蝕）；疫情前因為郵輪已經不時有腸胃病毒爆發，所以疫情後手部衛生措施大致一樣，疫情前後分別體現喺船客主動性上，都有相當多人會主動搓手。

今次搭兩隻船都係挪威郵輪 (NCL)，兩隻之前都坐過，地中海嗰隻船2021年8月已經投入服務，冰島落英國嗰隻今年4月投入服務，前者基本如常（甚至比疫情前有進步），但後者方方面面都有明顯縮皮表現，例如夜晚表演做得一場、早餐款式選擇極少。另一方面，兩程船都大概只有五六成滿，所以兩次體驗都頗為自在，食自助早餐唔使坐到老遠先有位。

【返香港】熔斷機制真係好得人驚。一路由五月到六月見到個機制不停改，連袁國勇許樹昌都出聲直指熔斷多嚿魚，但把刀仍然吊喺度，放寬完都係會斷。可以理解制度仍然存在涉及強大政治阻力，但具體設計上真係表現出太多無能弱智。又係靠彩數：土耳其航空航班六月中被熔斷過，熔斷後首班航班喺自己班機之前3日起飛：根據現行制度，需要兩班機都違規而且獲證實之後先會熔斷，因此短時間內唔太可能再觸發熔斷，事實上都如期返到香港。土航都明顯十分緊張，登機口前再詳細核對指定酒店名單，而且每一個預訂記錄都會影相存檔，應該可以減少違規機會。但土航航班相當人多，觸發熔斷風險難免較高。

位於香港國際機場中場客運廊之傳染病交流樞紐，來自世界各地的旅客與本港居民歡聚一堂，在填表之餘伸出病毒黑手交換傳染病媒（專用洗手間得一間有幾多人會去洗手？）。

航班六點十分降落，九點十五分入到隔離酒店房（東涌）。檢測放行時間長早有預備，但意想不到係要行咁多路，而且其時只有一班土航落地（雖然土航通常都好滿），好多位置都有人流堵塞聚集，例如Ｎ條隊、填表、搭無人駕駛、等巴士，所以難怪經常有人住隔離酒店後期驗出陽性，因為整個抵港過程都有十分充裕嘅時機交流飛沫。安排需要極多額外人手維持，社區感染根本不能防堵。喺香港經歷第五波建立免疫屏障之後，大費周章動用醫護人士為抵港人士採樣，對於保護醫療系統到底有否實際價值？

[ 本帖最後由 chankahon 於 2022-6-26 21:41 編輯 ]

#口罩 #土耳其 #機場 #歐洲 #郵輪

回覆引用 TOP

nicekate VIP 帖子 6175 積分 5637 註冊 2010-1-31 發短消息加為好友	#2 發表於 2022-6-22 18:11 只看該作者大中小繁簡請問樓主而家轉機，仲有冇大混亂。如果喺伊斯坦堡預兩小時轉機趕唔得切。諗住七月重遊克羅地亞。
UID 4036245 帖子 6175 精華 0 積分 5637 金幣 2125 閱讀權限 60 在線時間 10148 小時註冊 2010-1-31 最後登錄 2022-6-28 查看詳細資料	回覆引用 TOP

chankahon

VIP

帖子: 7281
積分: 9055
註冊: 2006-8-7

發短消息

加為好友

#3

樓主發表於 2022-6-23 18:00

伊斯坦堡機場本身似乎應付到龐大人潮，如果去程兩個鐘應該係可以（香港去程去到係繁忙時段，但安檢人龍應該半個鐘排得完）；風險在於克羅地亞飛返土耳其嗰程－克羅地亞嘅機場暫時未有類似新聞流出，但難保唔會有骨牌效應，土航其他航班都有延誤數以小時計，回程最好唔好得兩個鐘轉機。今次冰島上船（6月1日）之前，有好多美國船客因為航班延誤幾乎嚟唔切上船。規劃上預留鬆動位會係明智嘅，唔好太chur，同埋建議搵下目標日子酒店供應先，人多起嚟床位都冇得瞓。

回覆引用 TOP

chankahon

VIP

帖子: 7281
積分: 9055
註冊: 2006-8-7

發短消息

加為好友

#4

樓主發表於 2022-6-26 21:31

寫咗一輪先發覺好似根本無講清楚去咗邊

【行程】唔計隔離全長44晚，一半陸上一半郵輪，大致上分地中海同冰島＋英倫諸島兩部分，最後返香港前停留伊斯坦堡。5月7日由香港出發，大家可能已經知道航班熔斷通常都唔會影響去程航班，所以出發係無懸念。住咗羅馬一晚之後，5月9日喺奇維塔韋基亞（Civitavecchia）上船，沿途十個泊岸日涵蓋意大利、希臘、克羅地亞同法國，一個航海日都無（真係好勊），去到5月20日意大利Trieste落船。

Norwegian Gem行程圖：

地中海行程其中一個bucket list item係五鄉地國家公園，亦係個人心目中嘅地中海icon。船泊La Spezia，由落船到Manarola用咗一個鐘頭（火車其實只係搭三個字），可以趁人煙單薄之時欣賞（一陣）小鎮風光。隨住人流灌入，各大村落越嚟越熱鬧，尾站Vernazza人頭湧湧不輸主題公園。時間同體力充裕嘅話可以喺小鎮之間健行，但最短路嗰條海濱小徑仍然修理中；亦可以搭船來往小鎮，但要就住船期規劃行程，今日趕唔切。

Santorini之Oia，點影都猶如明信片一樣，係抵佢咁多人嚟。郵輪會泊Thira對出海中心，所以嚟Oia要先搭吊車登山再轉巴士，不過巴士去程行山路回程就沿海行，好有scenic drive嘅情趣（巴士一貫希臘式時間觀念－總會遲但總會到）。拋錨時間朝十晚十，上晝先跟團行火山，下晝先去Thira搭巴士，吊車冇人排隊十分爽皮。

Gem@Santorini, Greece

之後喺Trieste＋Mestre（威尼斯過大海之後第一站）分別住宿一晚同3晚，之後由威尼斯搭Wizz Air直飛冰島雷克雅未克，住8晚之後直接喺雷克雅未克上Norwegian Star，先連玩三個分佈西部峽灣、北面同東面嘅冰島城鎮，一大個航海日之後連續六日喺愛爾蘭海之間六個地方泊岸，6月12日修咸頓落船。

Norwegian Star行程圖：

落船之後同樣又係修咸頓＋倫敦分別住宿一晚同3晚，用足一日由Gatwick搭飛機去伊斯坦堡，然後喺伊斯坦堡住宿四晚先搭飛機返香港。郵輪之間同飛返香港前都有刻意預留緩衝時間，以防航班問題影響行程，而且行程上亦需要時間嘅。

以冰島為起終點嘅郵輪通常都係較小型嘅歷奇或豪華郵輪（艇），玩到上九萬噸級，呢班船據船長講係第一次，所以雷克雅未克港口設備似乎未跟得上，差唔多到預定開船時間，先輪到啲行李先慢慢被夾上船。但冰島港口好近，遲兩個鐘冇影響行程。

Seydisfjordur－既無觀光團搞手、亦無的士可搭，無論係搭NCL嘅窮Ｌ定銀海郵輪嘅富婆，如果唔租車此地唯一可做就係行路。畢竟冰島最好嘅都唔使錢，當地政府好有心整咗一段山路深入峽谷，靜觀群山環抱、聆聽瀑布飛濺，仲可以同冰島純淨水嚟個零接觸－行到中途發現原來係要直接踩落水嘅呢，好清涼。

行程裡面雖然叫做有蘇格蘭，但唔夠時間去酒廠，好在仲有愛爾蘭：仲係愛爾蘭最大嘅威士忌蒸餾廠呢。今程船有三個港口都遠離大城，例如Greenock入Glasgow要九個字火車，Cobh去Cork要半個鐘，但停留Cobh亦可以揀去Midleton蒸餾廠，交通方便，而且導賞團算用心製作。之前喺都柏林有人推介小弟買嘅藍色Powers都係喺呢度產出，不過最終喺蒸餾廠附近間Tesco搵到減價11歐，更開心。

搭郵輪有兩大perk萬勿錯過：駛出同日落。冰島峽灣氣勢不及挪威，但奇山唔少而且好多海鳥跟飛。日落就要睇時間，嚟到冰島北岸已經接近極圈，想睇鹹蛋黃跌落大西洋要捱夜。

個半月內一共有22晚喺船上過，停靠19個港口，絕大部分港口有8個鐘以上實用時間，Santorini仲連日落都可以睇埋先落山。兩個行程嘅港口選擇同時間分配都恰到好處，密集程度同Azamara有得比。上得郵輪就要適應tasting menu心態，每個地方精選兩三個重點去一去，意猶未盡就放入未來bucket list。話雖如此，不停換畫有如耐力賽，消耗精力亦相當燒腦，只會係因為想用完手上兩份CruiseNext先會咁排法。

由於全程實施勒緊褲頭消費方針（例如打包早餐同免費景點優先），郵輪期間花費低於平均。即使郵輪觀光之本在於不求甚解，一口價就可以一邊吃喝拉撒睡一邊轉移陣地，成本效益有保證。

港口慳家之最係利物浦，落船就係ex世遺The Three Graces，穿梭一堆免費博物館，只係喺Poundbakery同Poundland買少少零食，是日開支HK$20.2（手信當然另計）。另一大路玩法係晏菲路＋奧脫福朝聖一日急行，但埋單就梗係要朝聖價啦。

【花費】疫情下旅行有兩大無可避免嘅額外財務負荷：隔離酒店＋檢測。眼見遊客蜂湧回歸，旅遊相關物價升勢都超前通漲，係咪可以保持開支平穩除咗傳統智慧早訂早著數，亦需要彩數配合。

✈ AIR

土耳其航空 ✈ 香港＞伊斯坦堡＞羅馬＋倫敦Gatwick＞伊斯坦堡＞香港＝HK$4552
WIZZ AIR ✈ 威尼斯＞雷克雅未克機票連一件寄艙行李＝HK$379

土航機票包埋英國離境稅（羅馬返香港三字頭咋），遇上如此低價但求飛身搶購，莫問推理解釋。至於WIZZ AIR喺意大利幾個主要機場都有航班飛冰島，威尼斯係今年新開。觀察所見，排隊check in嘅乘客中既有同陽光玩遊戲裝束，亦有密實長袖行山友，兩邊都有人飛過對面，問題在於夠唔夠人飛足幾個月。

威尼斯飛冰島接近四個鐘，但好在隔離位冇人，整體搭乘體驗上佳。相對於各大樞紐機場日日上頭條，威尼斯機場顯得相當安寧。

🛳 CRUISES

NCL 🛳 地中海郵輪11晚連服務費：HK$5975.97（CruiseDirect.com－單人獨佔IX內艙房、每個港口有$50美金岸上觀光消費額）
NCL 🛳 冰島到英國郵輪11晚連服務費：HK$7482.98（NCL UK－單人獨佔IX內艙房、無其他優惠）

挪威郵輪恆常會喺最後關頭全免單人附加費推銷滯銷行程，有時幾個月前就有，今次只得20日前。官網近排更新介面，去到揀艙房版面可以睇到所有賣唔出嘅房，再留意下較近期出發嘅類似行程有冇單人優惠，可以推算心儀行程會唔會有得減。

就算二人同行，理論上都可以各自訂一間房（例如一間露台一間內艙），因為部分郵輪優惠或者會員待遇係以艙房為基礎，比如每個港口嘅50美金岸上觀光團扣減原本只適用於每間房其中一個人，訂兩間房就可以兩個人各自有得扣。郵輪觀光團定價非常進取，有時減完50美金都仲貴過出面，不過遇上walking tour或者接送巴士定價49美金，就等同免費有車搭。

但今年減價形勢比較難料，一來暑假通常唔做優惠，二來因為船上請唔夠人，船公司未必想賣清艙房。近兩個月有關搭飛機嘅負面新聞，亦可能令部分人轉而考慮就近港口上船搭郵輪（尤其英國）從而推高需求，畢竟郵輪罷工認真聞所未聞，行程有調動通常係因為天氣惡劣或者有人要去醫院。

朝早起身不見天日唔係人人受得住。個人覺得內艙房幾好瞓，一來冰島、英國日出時間比較早，二來郵輪喺強側風下會左右擺，內艙房嘅床因為床尾對正房門，會好似搖籃咁前後擺（有助睡眠），露台房嘅床就會左右碌（試過成晚不停碌醒）。

🛏 STAY

雷克雅未克 🛏 Austurbrún 2 高層海景寒舍 HK$4,759.3／七晚（新盤上市酬賓價）
修咸頓 🛏 ibis budget Southampton Centre HK$276.92／一晚（Agoda神奇連稅價）

雷克雅未克寒舍無敵景觀。因為技術問題需要臨時另覓住處，本來已經全城爆房，剛啱寒舍新放盤，即使得一張廚房相都要（人在冰島有廚房先可以嚴控伙食開支）。非常榮幸成為首位貴賓，新屋入伙難免多沙石，但睇下個日落景即刻醉咗，咩甩漏都拋諸腦後。呢個位入市區一定要搭巴士（樓下有站），但可以行落去郵輪碼頭。即使如今酬賓價不再，但如果有三四個人分享都仍然值得，類似self-catering嘅民宿供應係較充裕，只不過高層海景實在少有。

冰島自煮首推土產羊肉，土產三文亦唔錯，但土產嘢並無價格優勢，進口生果一個幾蚊有交易，健康生活觸手可及。冰島超市業者寡頭壟斷，個人經驗去Bonus（最平但唔多選擇）＋Kronan（次平但一應俱全）就可以買齊最平嘅嘢，而汽水就邊度都咁平－Coke Light 500ml 一樽ISK141，平過英國。

綜合44日一條大數，未計隔離酒店總共五萬－扣除機票後，郵輪期間平均每日總開銷HK$984，岸上開銷一如所料相當懸殊：雷克雅未克八日平均日花HK$1411左右、伊斯坦堡四日平均日花HK$760左右。隔離酒店預訂其時剛啱開始有七日房供應，加上內地轉機大軍未發現新大陸，每晚一千左右。

🚌 TOURS

凱法利尼亞出發（碼頭附近旅行社出發）🚌 Highlights of Kefalonia Tour HK$343 10:30am-3:30pm（Viator - 手機程式新用戶九折優惠）
雷克雅未克出發（自選接送點）🚌 From Reykjavík: South Coast Day Trip with Glacier Hike HK$828 8am-8pm（Getyourguide - APP10折扣）
Ísafjörður出發（碼頭接送）🚌 Dynjandi & The Westfjords 9:30am-2pm HK$1098 （Arctic Shorex官網）

不論觀光團、交通券定景點入場門票，經Getyourguide手機程式都可以套用APP10優惠碼，無論係威尼斯兩日券定Titanic Belfast，統統都可以打九折，而且會換算成用港紙收費，外幣匯率比信用卡靚。喺土耳其之外，大多數Getyourguide觀光團嘅定價都比當地直接付款更低，打埋九折抵上抵。Getyourguide買門票通常可以即時用得，但有時主辦單位經Getyourguide賣飛會有時限，即買即入並非絕對。

玩觀光團導賞團，人很重要。今次好彩大多數導遊都滿腔熱血，例如冰川帶隊嘅Tomasz，全程12個鐘無冷場，帶隊行冰川非常盡責（而且識揀時間避開人潮），推介當地嘢時相當誠實，Dynjandi同Heimaey都係佢主動推薦。話說喺冰島有三個導遊都稱Dynjandi為個人最愛瀑布，地位超然。

雷克雅未克觀光團價格其實幾有競爭力，South Coast由接到送前後足足12鐘，冰川健行三個鐘頭，其他主要景點都一一包羅，九折後只要800幾。相對而言，冰島其他地方出發嘅觀光團選擇少而且價錢貴，有兩個人都應該考慮租一日車。地中海各大港口觀光團選擇繁多，但同時絕大多數地方都方便自由行，最多係時間冇咁好用。伊斯坦堡觀光團網上標價偏高，如果有興趣不妨喺當地查詢。

【現金 vs 信用卡】原本有喺香港換定英鎊歐元，但意外地只帶走一部分歐元出發，土耳其以外盡量都碌卡。錯有錯著，匯價喺臨出發前再進一步貶值，所以信用卡相對都唔算好貴，但匯率差在所難免。重要嘅係，疫情下唔少地方都少收現金，畀現金都未必有散紙找（仲要睇店員面色），所以信用卡差價根本無可避免。手機支付喺歐洲、英國都非常盛行，Oyster都慳返唔使買（封頂價同樣適用於信用卡），但一般商戶運通卡接受程度依然低迷。土耳其則依然cash is king，無接觸支付唔算普及，用IstanbulKart要排隊自助現金增值，好鬼麻煩。

[ 本帖最後由 chankahon 於 2022-6-28 21:03 編輯 ]

回覆引用 TOP

noel2046	#5 提示: 該帖被管理員或版主屏蔽
noel2046 Silver Member 帖子 14549 積分 12600 註冊 2011-8-17	#5 發表於 2022-6-27 12:45 只看該作者大中小繁簡提示: 違規內容已被屏蔽
UID 4634093 帖子 14549 精華 0 積分 12600 金幣 2541 閱讀權限 70 在線時間 3284 小時註冊 2011-8-17 最後登錄 2022-6-28 查看詳細資料