• 瀏覽: 17,809
  • 回覆: 37
  • 追帖: 3
  • 分享: 5
+207
上星期飛完大阪(高野山+瀨戶內海+岡山+京都),繼五六月歐洲之後疫後第二度出門,今次無溶斷無隔離,返香港網上登記比日本仲簡單,全程天氣好好,只係擔過一個鐘頭遮,月全食睇足全程:


Pixel 6影月食出奇地清 - Google係咪直接key個月亮上去?

歸納一下疫後日本旅行膚淺觀察:

洗手、洗手、洗手

半年前嘅歐洲,由意大利到冰島到英國每一個用過嘅洗手間都裝備齊全,即使喺土耳其,梘液盒空空如也嘅亦只係非常少數,當時覺得應該係土耳其鬆懈咗。

半年後嚟到日本,百貨公司同餐廳都會有泡沫式梘液,不過戶外公廁就唔一定,略為偏遠嘅通常連梘液盒都唔見,有啲就稀釋到水咁,一唧落手就流走晒。絕大多數廁所停用乾手機,抹手紙會random地出現,小店廁所通常比較齊整。

日本之後去台灣,梘液供應情況同香港相若(最少都有番梘...),日本係與眾不同。


清水洗手@岡山城公園

日本公共場所一般都會喺門口擺噴霧式消毒酒精(多數係腳踏或感應式),有時侍應會好似郵輪咁直接washy washy將酒精噴落你對手上。

歐洲或者香港比較常用啫喱酒精係有原因。梘液同酒精都係透過破壞病毒外膜嚟deactivate病毒,滲透過程需要一定時間,所以捽手係需要配合耐性。加入甘油可以拖長酒精喺皮膚上嘅蒸發時間,如果只係直接噴薄薄一層酒精,兩三秒就會揮發晒,幫病毒留一手。有酒精總比無酒精好,但可以搓耐啲會更好。

日本幾乎每一間餐廳翻檯都會認真用噴劑抹乾淨,雖然喺冰島都見過呢份認真,但當然不及日本貫徹始終。整體印象,日本係喺固我基礎上做多做足,但同歐洲比較,根深蒂固嘅改變未算非常有感。

關西機場未完全ready


由關西機場飛出,要有心理準備面對長長人龍兼無啖好食

關西機場T1一向都係有少少超負荷,疫情下出入境似乎都有壓力。今次星期一夜機到埗,同時間冇咩國際航班過程暢順,但如果多一兩班機同時到,似乎搞檢疫嗰部分會比較容易有樽頸。香港空姐鼓勵大家繼續手填海關form,實地體驗係比較爽快,大家都可以繼續填紙本海關表格。JR Pass可以自助攞飛唔使再排窗口,所以JR櫃檯唔太多人。

飛出關西機場係傍晚繁忙時間,兩個鐘內有幾班香港、韓國、新加坡、台北航班,安檢要排二十分鐘以上,好有六月排Gatwick嘅感覺。入到去air side間Family Mart原來六點拉閘,搭廉航要靠自動販賣機。好在喺京都站已買定奈良柿葉名店便當,加樽飲料就ok,否則就只有忌廉包同蛋糕落肚。


十年前關西機場免稅店係有關西物產可買,但三年前就變成同成田機場沒兩樣,喺關西買香蕉蛋糕返去點交代?不過仍然無阻眾人蜂擁排隊,國泰地勤仲要出嚟捉人final call。

無接觸支付不成氣候

半年前去歐洲,另一大變係現金已經去到被嫌棄嘅地步,羅馬天使堡寫明不收現金,買嘢食嘢畀現金有可能會無得找,亦容易招致黑面,或者被找續一堆神沙。站在收銀立場,個個Apple Pay畀錢確實簡單。

日本就無咩改變,超市陸續有自助收銀,連鎖便利店亦常見自助收錢機,但例如Loft同百貨公司之類嘅零售商有唔少連NFC信用卡都唔收(佢哋用Paypay嗰啲多),有啲要人手輸入銀碼嚟收Apple Pay,過程一啲都唔快,所以現金仍然最優先。

酒店人手緊張 大城市供過於求

今次最遠玩到高松(用盡廣域pass),二線城市酒店人手狀況非常堪憂。住高松LiveMax,因為人手唔夠,由9月開始前台下晝三點先開始有人,仲要借調兩個尼泊爾籍外援嚟做前台,其中一個話佢自己係用學生簽證留低,本來做福岡LiveMax,喺高松已經住咗一個月酒店,唔知幾時返到去。

喺高松附近嘅宇多津(養金魚觀景台所在),車站附近嘅外僱存在感都非常大。大阪同京都都係住經濟型酒店,人手狀況雖然都似乎比較單薄,但未需要出動外僱做前台,而且大型集團喺都會圈請人係會易啲。前台職員識英文某程度上係好事,但影響到服務時間同早餐供應,可能同住客期望有差。


酒店一年前開始因為疫情唔做早餐,期間疫情高低起伏,一年後終於等到開關,但唔單止朝早仍然係無早餐食,成個大堂一個職員都見唔到。日本人手之亂只係開始。

京都大阪仍然有酒店未復業。雖然日本政府熱情贊助本地人國內旅遊,但日本人比較少平日攞假,星期六房價因而大幅推高,但星期日到四就跌落凡間,大城市常見HK$300以下一晚單人房,價錢爛鬥爛,京都三條Prince Smart雙床房低見HK$270一晚連稅,平到難以想像。機票支出或者多咗(燃油附加費都唔平),但住宿可以慳返少少嘅。


據說係2021年10月開幕嘅新酒店,到今年年頭BWH出曬新聞稿宣傳,但Omicron之後就關門大吉,前景不明。

綜合近幾個月實戰經驗,訂酒店最平係用電腦經瀏覽器直接Google搜尋酒店名,之後揀Google比價清單上最平嘅價錢(通常係Agoda),出嚟個價錢會套用大額折扣碼,折扣通常會比Agoda App多。如果喺日本當地搵酒店,要小心Agoda可能會自動套用日本政府旅遊資助(2023年又繼續資助...),個價錢香港人唔用得。訂hostel要小心Agoda可能會標錯床位價落private room,已經體驗過兩次。



新開幾個月嘅Prince Smart佈局比較特別,淋浴間開門直出走廊,得一塊好似醫院床位咁嘅薄窗簾隔住(引述Google上嘅日本人毒舌評價),唔太適合同父母或者同事同住。開關後仍然價格低殘,但任何房價都會每人包一份小早餐,即使輕到吹得起,都頂得一兩個鐘。重要嘅係咖啡非常香濃夠力呢,好難得。

香港人存在感廣

以為台灣人多勢眾應該會無處不在,但喺日本9日,以香港人存在感最廣,由岡山、香川縣到小豆島都有廣東話聽,寒霞溪同一架吊車有另外兩組香港人,睇嚟大家都好善用關西廣域周遊券。直島有唔少外國人慕名而來,遇上兩個丹麥遊客包起直島町民會館慢慢欣賞設計細節。台灣人分布似乎略為不及香港人,東南亞客就完全集中一線旅遊大城市,逼爆京都熱門景點。


丹麥遊客其實分別係建築同室內設計大專教授,日本一解封就去直島朝聖,因為我喺町民會館後花園裝下裝下,佢就俾我入去睇埋一份。佢話租金都將貴,但三分一博志嘅好設計佢非常樂於分享。地中美術館語不驚人死不休,町民會館則係大智若愚不著痕跡,如果有機會開放參觀請放入bucket list。


清水寺個靚景係抵佢咁多人。京都大多數景點都係比較從容,但香港人係去到邊都避唔到。

紅葉見頃情報不必盡信

以往喺日本睇紅葉通常都係十一月底十二月初,目擊嘅總係市內最後一撮紅葉+山上一大片枯枝樹林。今次十一月初屬關西紅葉季節之初,密切留意見頃情報,不過實地考察之後,發現見頃例行時間同實時監測都只供參考,聲稱見頃嘅嵐山只有零星完全轉紅,反而11月14日當時未轉見頃嘅清水寺已經有好多好多紅葉。櫻花或者比較準時,但紅葉轉色受天氣、雨量、陽光方位等因素影響,紅葉總係一忽忽轉,個人經驗係早比遲好,有綠葉扶持嘅紅葉係比較可觀。


和歌山高野山局部見頃,只要有好角度仍有好風光


寒霞溪不負盛名,紅葉可觀,下晝搭吊車光線正好


京都知恩院-紅葉不必多,點睛足矣


喺京都鐵博蒸汽火車上欣賞梅小路公園紅葉,起碼呢300yen洗得無咁寡

Yen真係平

雖然Yen價沿途一路反彈,但日本物價指數升幅依舊相對低,就算消費計六算都仲係好平,喺京都每一次夜晚行Seria / Daiso都總有香港人在左梗,唔買對唔住自己。遊日預算依舊,但今次可以升級食下Tabelog燒肉百名店、一星懷石料理,感覺良好。但日本真係不一定貴食先過癮,慳慳地食好西亦得,今次平食都有美好印象。如果要認真搵,可以用 Google Map + Tabelog 對照分數,一般而言多外國人幫襯嘅餐廳,喺Google會比較高分。


之前去日本,總係覺得搵素食好艱難。直島嘅玄米心食走清淡路線,未必人人啱胃口,但想學習品嚐日本食材之美,其實日式素菜(有時叫精進料理,但不一定)係幾好嘅一個方式。


粗食不一定劣食。松乃家1100 yen炸物雜錦,大堆頭亦絕不欺場,碗飯起碼係香港標準1.5碗,靠佢安然捱過由京都出關西機場之間嘅飲食真空。

同場加映:廣東話絕跡嘅台灣

有外國護照可以自由入境台灣,而家可能係好時候。相對日本,台北酒店似乎有少少貴,但高雄就好平,而且遊客比例非常低,廣東話稀少。台灣雖然要求兩日一次快測,而且口罩令比香港日本更加嚴,但入境基本無手續,日常生活跑行程咩安心通行證都唔使,趁哩數機位供應充裕可以考慮去台灣,而家喺台北故宮仲有日本國寶油滴天目現身,去大阪反而睇唔到呢。


桃園機場會派快測試劑,所以唔需要準備太多。除咗派試劑,並無特別檢疫手續。


高雄光榮碼頭聖誕燈光秀:上網搵完一輪都唔知佢幾時正式開始,但11月21日去到現場,似乎已經開始每半個鐘做一次三分鐘rundown,九半同十點都有唔同款式,真係相當出色。正式演出時間會係六點到十點。

[ 本帖最後由 chankahon 於 2022-12-2 01:03 編輯 ]



清水寺人流真係..........

當日係星期五

[ 本帖最後由 chabaox 於 2022-11-21 06:01 編輯 ]



附件

20221111_131410.jpg(230.8 KB)

2022-11-21 05:55

20221111_131410.jpg



謝謝分享



分享 市況好詳細


[隱藏]
引用:
原帖由 chabaox 於 2022-11-21 05:55 發表
清水寺人流真係..........

當日係星期五
嘩好多人,本地人定旅客



引用:
原帖由 努力小黃瓜 於 2022-11-21 23:31 發表

嘩好多人,本地人定旅客
兩樣都有,仲有好多小學生冇入鏡



日本政府而家資助國民住酒店,所以單計本地人已經填滿大半條清水坂,然後全國學校都鍾意嚟京都修學旅行,中小學生源源不絕灌入清水寺,前面石級好似畢業禮咁。外國遊客小眾嚟架咋...






清水寺都算感受下氣氛,但個人覺得嵐山真係有少許被人海影響體驗。京都古剎無數,行程最好分散下,唔好集中全地球都衝去嘅一級名勝。


行竹林小路宜早不宜遲,人頭湧湧真係感受唔到個氛圍



前面石級好似畢業禮咁




樓主形容得非常好



日本政府支持日本人去旅遊個政府幾時完
咁多日本人既地方其實都幾嚇人



[隱藏]
好似去到1月31日
話說京都一向都旺場,清水寺紅葉絕景係一定人多,絕大多數景點冇咁誇張嘅,例如京都鐵博平日好鬆動。



引用:
原帖由 BlackAjah 於 2022-11-22 11:01 發表
日本政府支持日本人去旅遊個政府幾時完
咁多日本人既地方其實都幾嚇人
唔係多日本人既地方其實都幾嚇人
係多人既地方邊度都會幾嚇人




講返行程先。去程用哩數搭國泰由香港直飛大阪,之後由大阪飛台北到高雄飛香港都係搭廉航,台灣主要係探親,日本主要係紅葉。國泰下晝機飛大阪係相當空虛下,其實若非周末或者靚時間,飛日本啲機都應該係供過於求。



今次全程都揀住疫情期間開嘅新酒店。因為打算上高野山,住新今宮一帶,就揀咗新世界Willows,通天閣風景天台唔記得上,房間平庸,早餐出眾。




11月8日 - 紅葉初見頃之高野山
出發前高野山已經標註係紅葉見頃,所以到大阪之後第二朝即刻搭南海電鐵上山。早一晚搭車入市區已經啟用兩日周遊券,畢竟高野山來回已經回本。高野山路遙遙,但因為唔想搬行李而且太短時間成行,無留宿山上。紅葉方面,今次第一次唔係睇水尾,所謂見頃想當然係綠中有紅,但稍稍變色都幾靚嘅。












真言宗兩大聖地同一個行程去晒,金剛峰寺作為修行之地似乎更有靈氣。作為旅遊勝地人氣亦示弱,星期二中午食晏行列處處,唔想等位最好食早或者食遲。


南海電鐵一出難波站,見到成街人望住個月亮,唔知咩事繼續行街,直到準時月食開始有香港朋友問日本睇唔睇到,先知哦原來日本今次月全食係比較清楚嘅。



Google Pixel 捕捉紅月亮好有本事,喺心齊橋來來回回搵角度,直到月全食食完。


星野間OMO7外面有個花園風景開揚,非常費解外牆做咩要圍到咁密實,可能大家期望比較高,暫時佢評分亦相對低。OMO7附近都係住宅區,搵食都係要去返新世界裡面。


Willows雖然對住阪神高速同天王寺動物園,但隔音做得還好,車聲動物叫聲都唔太應聲,綠樹成蔭景觀唔錯。

11月9日 - 岡山後樂園


第二日開始動用廣域同遊券,搭下闊別三年半嘅山陽新幹線,踩到廣域盡頭岡山站。


去日本,遊園係指定動作。三年半前去過兼六園,終於嚟到後樂園,一眼睇晒嘅大平原有別於典型一步一景迴遊庭園風格。



即使寬廣園林,景觀都仍然會隨角度轉變,都尚可稱得上一步一景,但或者唔及兼六園咁多擺陣變化。


十一月底秋夜點燈特別活動,遮陣提前預備,點綴下草地也無妨。



十一月初紅葉未成氣候,後樂園個佈局似乎都唔係十分紅葉-friendly,或者點燈期間可能會多啲紅葉,影到水面反射。



岡山城同後樂園有套票,但入後樂園時無為意岡山城維修後重開一星期都未有,無買套票,於是就乾脆唔上去。烏城天守直到二戰先被盟軍炸毀,眼前呢座係戰後重建,裡面其實係睇展覽同風景。


岡山城公園有聲畫裝置藝術(data.flux [LED version],池田亮司),屬於瀨戶內海三年展場外展,四點到九點不停播介乎音樂與雜音之間嘅電子節奏聲效,但個喇吧開到好大聲,成個公園幾個鐘頭都好有節奏。


今晚去岡山Aeon Mall買減價壽司。減價時段係最能體現日本人本性嘅場合,尤其係減價氣氛比較熾熱嘅百貨公司,個個都成手刺身壽司,搶完再慢慢揀,但Aeon一般比較平靜,大家只係會按時跟住店務員等貼貼紙。呢間 Aeon Mall 有按時收費嘅泊喼機(100円一個鐘),之後星期日岡山馬拉松再次路經岡山,但成個岡山站冇晒locker,過咗嚟泊喼。


到高松:因為訂房發生意外今晚臨時改住AreaOne,唔推薦費事寫。下回再寫直島+小豆島。



高松 AreaOne 差過 高松 LiveMax嗎? 價錢上差距大嗎?


後樂園 景色分佈較散,易走漏眼,我覺得都係好靚.


[隱藏]
景靚相正,多謝ching 分享


鍵盤翻頁
左右
[按此隱藏 Google 建議的相符內容]