• 瀏覽: 1,036
呢個世界真係乜人都有,做咗咁多年嘢,自問都見過唔少人,原來一個同事真係可以賤到超出你想像,此人暫名K。

自由上班時間
疫情期間,人人謹守崗位,真係中招就唔返工。但呢位奇人K,有一個星期突然wfh, 原因係佢媽媽個朋友個朋友中咗,而佢琴日有同佢阿媽食過飯。成班同事O晒嘴。前排打風,8號風球後嘅兩小時係需要返公司,所有人無論住都幾遠,兩個小時後都有現身。唯獨K,住公司第二最近,竟然自行wfh。如果唔知,一定以為佢係老細,自由上班。

有舖角色扮演癮
話說K係HR出身,Marketing經驗係零,但一次跨部門大型活動,我哋負責做helper,綵排當日,佢衝上台角色扮演做PIC,喺老闆s前表現自己。真正嘅PIC 勁無奈。

辭職後搞大龍鳳
K辭職後,突然話畀主管聽佢有好多ot leave,只剩五日會返工。唔緊要做好交接,其實五日都夠。呢條賤人,同老闆們講到自己有幾咁helpful,接手佢工作嘅同事日日催佢,佢就不斷推莊話自己做緊handover list。到K肯交接果日,佢咩list就冇,用手寫幾隻字,是但畀個File,就當傳授咗佢所有工作嘅文件畀你。

打開才發現全部File都係吉,所謂嘅master list,只有一行字。最後嘅上班日,由於朝早要開會,開會前同事已經捉住佢問嘢。開會後趁住同事如廁嘅3分鐘,佢就玩失蹤。你以為佢Lunch,等到過晒鐘都未返,手提電腦又帶走埋。大家當然打鑼打鼓問佢去咗邊,呢個時候佢施施然返嚟,同事們再捉實佢問嘢,再打開個電腦嘅時候佢就話全部嘢都已經delete晒。電腦同全新冇分別,一樣嘢都冇。拍拍屎忽,就走人,留低大量屎畀人執手尾。

後記
K辭職後,同事們分別開始收拾爛攤子,某日有人打電話來查詢,同事當然係一頭霧水。對方話K做嘢比較隨便,無咁多書面記錄,同事都無奈,唯有講如果你唔提供,就幫你唔到。一個人要幾求其,人哋先會話你隨便呢?

[ 本帖最後由 holimking 於 2022-11-25 15:01 編輯 ]



主題標籤 #在家工作
[按此隱藏 Google 建議的相符內容]