• 瀏覽: 89,597
  • 回覆: 198
  • 追帖: 18
  • 分享: 41
+24
本主題由 mhmimi 於 2023-1-27 10:21 提升
前言︰估唔到一個疫情,就攪到連澳門都去唔到長達三年之久,呢段時間因為要清假,所以基本上每個月都要最少休息兩天,依家唔需要檢疫同隔離,自然就趁天氣好之時平日過一過去行吓,食兩餐同買些少手信


晨早起身執返少少隨身用品,就出發上東涌線,上咗港鐵之後望一望個App,依家B5成30分鐘先一班車,距離下一班車仲有二十分鐘,希望趕到!結果去到欣澳站之時介有十分鐘左右,嗱嗱臨出閘快步行去B5巴士站,好在上車位置同三年前一樣!準時巴士就到,等車之時感覺唔算太多人,希望一陣金巴唔需要排好耐。

去到大橋口岸,出境方面都好順利,之後就喺自助售票機買咗金巴嘅巴士飛,順路就出去等車。今日我坐呢架金巴係雙層,唔算全架爆晒不過都九成幾滿座。大概45分鐘後就好順利就到咗澳門口岸,入境時人流亦都唔係好多,自助通道排隊只有一兩個人,幾分鐘後終於三年幾以嚟,第一次踏步澳門境內。

出到公共交通交匯處,見到有架去MGM的發財巴,咁啱我今日第一站要去嘅地方就係宋玉生廣場一帶,於是我就跳咗上發財巴。連等車同車程,大概半個鐘左右就到咗市區,點知可能因為太耐無嚟,行到錯晒,原本去巴黎街點知行咗去廣州街方向,最後攪咗半個鐘先搵到要去嘅地方,澳門通客戶服務中心!


由於大家都唔會預期三年無機會過嚟澳門,手上嘅澳門通住部已經鎖晒(三年無交易),所以今次嚟澳門第一站係先幫我同朋友嘅澳門通解鎖,原本以為只係將啲卡解鎖,好快就可以攪掂,點知去到客戶服務中心之時,排隊嘅人好多,要排成三十幾人,服務的櫃台只開咗三個,而且佢係分兩條隊,好似一般查詢、買卡、開鎖呢一類係排A隊,而本地人換卡、補領卡之類係屬卡B隊,而澳門通方面係俾B隊優先服務,即係如果同一時間B隊有人,佢哋係可以首先獲得服務!其實呢個我都理解,當然係本地人優先,你估香港有啲傻仔叫政府派錢俾外地人咩!?

不過理解還理解,等咗十幾分鐘A隊只係服務咗一個,於是中佬就出一出去,幫朋友攪咗銀行入數先,順便換埋MOP,攪咗半個鐘之後返到去客戶中心,仲有27個號要排......今朝出門匆忙,早餐都未食,依家已經好肚餓!唉都係唔等!食咗午餐先!
皇朝區呢一頭當然都大把嘢食,不過中佬今日就揀去遠啲嘅餐廳,因為成三年幾無嚟,希望第一餐就食返自己最鐘意嘅餐廳。由客戶中心出發要行成半個鐘先到南灣湖,途中經過幾間之前都有幫襯過的食肆,好似係西X咖啡、金X滿堂,雖然今日就無時間幫襯,不過都慶幸疫情下佢哋都仍然頂得到。

去到中佬的心水餐廳亞X,門前有幾檯,室內都仍然有位,尤其係今日我只係一條友,相對易搵位。一行入去就見到老闆娘,中氣十足仍然滿場飛,收銀、帶位、落單全部做齊......雖然我唔識佢,不過都好開心見到幾年無見,大家都好似仍然健健康康,呢一樣嘢都好緊要!

今餐食咩呢?中佬就簡簡單單叫咗一個周打魚湯,主菜就要非洲雞,本來想加個木糠布甸,不過侍應話所有甜品賣晒,今日做唔切!


一路食之時,聽到左右隔離都係香港口音,相信同中佬一樣因為幾年無嚟而揀呢度食一餐嘅香港人都唔少!

食完就立即過返去澳門通嗰一邊,以為去到應該差唔多到我,點知去到次時由59號已經去到149號!唉!過咗就重新排過,無辦法!好在客戶中心入面有提供wifi,我可以睇吓Youtube,打埋上星期深水埗場波的戰況,再打個Candy Crush消磨時間!當日聽到唔少人入來第一時間就講「我三年無來,張卡鎖咗!」,之後就由工作人員安排,同中佬一樣排A隊,當然都有唔少人等唔到閃咗!我見到最誇張係一個年青人攞住一盒卡入來搵工作人想解鎖,我見到每一張卡上面都貼咗人名,相信都係一班朋友委託佢開鎖。工作人員問佢有幾多張,中佬聽到好似話四十幾張!以每一張要兩分鐘去解鎖,呢盒嘢個半鐘有少無多,仲未計排隊時間,都唔知幾點先攪完......

最後中佬等咗超過兩個鐘,先埋到櫃檯服務,我手上五張澳門通之中,有兩張是屬於舊格式,由於超過多年無用,已經開唔返,第一代嘅退返30蚊按金,而另一張由於係銷售版,所以無錢退。我另外三張第二代格式嘅就可以開返,不過由於超過三年無紀錄,所以大部份餘額都已經作為手續費被扣晒!忽然想起電影雷洛傳經典一幕,當時未成名嘅張達明飾演嘅「懵口平」講︰「喂!阿Sir,你唔好借啲意扣吓扣吓喎!」。

而我朋友交俾我嘅四張卡,有三張由於2020年三月嚟過澳門,所以未鎖,不過另一張就開唔返!最後我幫其他啲澳門通實名埋,之後就終於完成今日的主要任務,估唔到要攪幾個鐘!最後中佬都喺度,多謝澳門通各位員工,十分辛苦咁幫大批「港客」解鎖返啲卡!

成四點半之後我先自由,之後都真係唔知去得邊,想去氹仔試吓輕軌,又好似唔多夠時間,因為一入夜就乜都睇唔到,於是就漫無目的咁行,由大三巴開始,圍繞澳門本島四圍行。



最後入夜之後,就去到河邊新街一帶,再前面就係十六浦,入去十六浦望一望,佢賭場入面間餐廳都幾抵食,一個碟頭飯都係五十幾,話晒都係賭場內。不過今晚中佬晚餐另有心水,行返去十月初五街,人流都唔算少,行過有一檔好多人排隊,八卦行過去望吓,原來都係炒粉麵之類,不過好勁鑊氣!唔知呢檔係咪當年上過電視嘅「細龜炒河」呢?不過網上傳聞細龜本人已退休多時,而今次見炒鑊嘅亦係一位阿姐!

今晚其實中佬亦都無搵以前未食過嘅餐廳,去到十月初五街都係去搵X記咖喱美食。最初計劃當然係食佢嘅蟹王麵,只可惜中佬早幾日個肚唔舒服,今晚唔敢食太肥膩,最後只係叫咗佢哋都有名嘅咖喱牛腩飯,點知冷不提防,原來佢個咖喱牛腩竟然係辣到跳舞嘅級數,中佬都辣到喪咳,唔知有無人以為我中咗招!

喺十月初五街食完晚餐之後,已經八點多,都係時間做埋最後一樣嘢。中佬行返回出新馬路,之後就搵一間手信店,求其買幾盒杏仁餅、鳳凰卷,之後又係時間返屋企!沿住新馬路好快又搵到101X嘅巴士站,好快亦都有巴士到,搭車的人唔算多,不過呢一架101X都兜路兜得幾犀利,短短路程,居然兜咗成半個鐘先到。

今晚經大橋返香港的人都唔算太多,好快咁又買咗金巴飛,出境......去到金巴上車點,問負責收飛個阿姐下一班車幾時開,佢話無定,滿就開車!咁都OK,因為始終依家係九點幾,如果以返香港嚟計都算係比較多人的時間。果然上咗車都係等咗十分鐘左右就開車,今晚呢一班都係雙層巴士,不過咁夜就唔會有咩風景睇!

今次回程好快,大概35分鐘左右就到咗香港口岸,之後入境人數都唔多,好快就返入香港境內。本來今日交通方面都算順利,點知去到呢一個時間先出事!似乎剛剛走咗一班B5,下一班車居然要等45分鐘......X!點算?等唔等好?於是唯有搵其他方案︰本來可以等10分鐘搭A21,不過中佬又孤寒,慳得就慳!另外可以搭B4去機埸,之後再轉E21,不過等下班E21又要40分鐘,先去機場根本唔會快得好多,尤其係E21亦都要兜好多地方,唔可能比欣澳出九龍快,最後唯有等下班B5,好在可以搵朋友吹吓水,等45分鐘都唔會好難捱!

最後半夜十二點前,順利返到屋企!

[ 本帖最後由 十二月田猛臣 於 2023-1-24 23:22 編輯 ]



牛記咖喱餐廳,我第一次去食,又係食咖喱牛腩面,辣到我飲咗三支汽水,我之前食過其他嘅咖喱面都係甜甜地嘅我都以為唔係好辣點知中招,我開關之後去過兩次澳門,發覺真係等車,最長時間都係啲接駁巴士,一班車隔一個小時


精彩遊記


101x 你可能搭錯方向


[隱藏]
引用:
原帖由 FATBOY19700331 於 2023-1-24 23:41 發表
牛記咖喱餐廳,我第一次去食,又係食咖喱牛腩面,辣到我飲咗三支汽水,我之前食過其他嘅咖喱面都係甜甜地嘅我都以為唔係好辣點知中招,我開關之後去過兩次澳門,發覺真係等車,最長時間都係啲接駁巴士,一班車隔一個小時
我好彩沒有去,唔食得辣



引用:
原帖由 冬天的冰雪 於 2023-1-25 02:33 發表

我好彩沒有去,唔食得辣
我就係食完金利,以為同金利都係差唔多味道,點知一食口水鼻涕乜都出嚟,只有不停飲汽水,我都唔食得辣,如果食得辣啲人應該會覺得好好食



提示: 違規內容已被屏蔽
引用:
原帖由 冬天的冰雪 於 2023-1-25 02:33 發表

我好彩沒有去,唔食得辣
冰雪早晨!
牛記辣過金利,如無食開辣可免則免。
初六初七房價仲升,放棄到澳門旅遊了



引用:
原帖由 ChiNa使用支付寶 於 2023-1-25 03:45 發表

冰雪早晨!
牛記辣過金利,如無食開辣可免則免。
初六初七房價仲升,放棄到澳門旅遊了
好詳細,但無驚起😙



[隱藏]
解鎖澳門通浪費得太多時間,比著我就咪搞!


引用:
原帖由 十二月田猛臣 於 2023-1-24 22:58 發表
前言︰估唔到一個疫情,就攪到連澳門都去唔到長達三年之久,呢段時間因為要清假,所以基本上每個月都要最少休息兩天,依家唔需要檢疫同隔離,自然就趁天氣好之時平日過一過去行吓,食兩餐同買些少手信


晨早起身執返少少隨身用品,就出發上東涌線,上咗港鐵之後望一望個App,依家B5成30分鐘先一班車,距離下一班車仲有二十分鐘,希望趕到!結果去到欣澳站之時介有十分鐘左右,嗱嗱臨出閘快步行去B5巴士站,好在 ...
我有2張澳門通,一張第一代過期,一張係過期前幾日,朋友過澳門時,幫我入錢同買野。都唔實名,2月10日取消實名制。
朋友亞哥之前去解鎖,要排一個鐘,估唔到樓主而家排兩個鐘,即香港好多人都有澳門通。



引用:
原帖由 FATBOY19700331 於 2023-1-24 23:41 發表
牛記咖喱餐廳,我第一次去食,又係食咖喱牛腩面,辣到我飲咗三支汽水,我之前食過其他嘅咖喱面都係甜甜地嘅我都以為唔係好辣點知中招,我開關之後去過兩次澳門,發覺真係等車,最長時間都係啲接駁巴士,一班車隔一個小時
中佬自覺唔係一啲唔食得辣嘅人,當然我當晚都食晒,無浪費,不過第一啖食落去無心理準備時真係奶嘢
反而其實當晚碗例湯係有驚喜,我甚至聽到有電話外賣指明問仲有無例湯



引用:
原帖由 冬天的冰雪 於 2023-1-25 02:30 發表
101x 你可能搭錯方向
我在噴水池對面的方向搭



引用:
原帖由 檸樂 於 2023-1-25 08:40 發表

我有2張澳門通,一張第一代過期,一張係過期前幾日,朋友過澳門時,幫我入錢同買野。都唔實名,2月10日取消實名制。
朋友亞哥之前去解鎖,要排一個鐘,估唔到樓主而家排兩個鐘,即香港好多人都有澳門通。
當時都唔知要攪兩個鐘,心諗好在老虎無過來,唔係咁等法今晚實頂痰罐
我都收到2月10日之後唔駛實名,我當日只係實名咗一張就算,當日我見好多聲稱三年無來被鎖卡嘅都係老人家,甚至當日去澳門嗰轉巴士,同個伯伯傾開佢張澳門通都鎖咗,我本來都有5張,依家得返三張仲可用 
中佬忽然想起一個問題唔知有無C Hing知道?
香港啲八達通紀念版買晒之後,可能喺信和、好旺角之類的地方用炒價買到,澳門又有無呢一類商場?



[隱藏]
引用:
原帖由 十二月田猛臣 於 2023-1-25 11:27 發表

當時都唔知要攪兩個鐘,心諗好在老虎無過來,唔係咁等法今晚實頂痰罐
我都收到2月10日之後唔駛實名,我當日只係實名咗一張就算,當日我見好多聲稱三年無來被鎖卡嘅都係老人家,甚至當日去澳門嗰轉巴士,同個伯伯傾開佢張澳門通都鎖咗,我本來都有5張,依家得返三張仲可用 
中佬忽然想起一個問題唔知有無C Hing知道?
香港啲八達通紀念版買晒之後,可能喺信和、好旺角之類的地方用炒價 ...
D長者可能係住香港,而有澳門身份證。朋友亞哥都係。但係佢地搭車唔使錢,但都要解鎖先用得。



鍵盤翻頁
左右
[按此隱藏 Google 建議的相符內容]