中佬窮遊系列︰報復性首爾睇波之旅 (更新至 總結，全場完)

瀏覽: 23,149
回覆: 44
追帖: 3
分享: 5

+153

列印

十二月田猛臣

VIP

帖子: 5631
積分: 5489
註冊: 2011-5-5

發短消息加為好友

[遊記分享] 中佬窮遊系列︰報復性首爾睇波之旅 (更新至總結，全場完)

#1

發表於 2023-6-4 22:41

前言/廢話︰
一個疫情，大部份人都無機會外出，到年頭終於開關，中佬望一望本Passport，仲有一年就到期，即係實際可用得返半年多少少。自從中國放棄咗主辦2023亞洲杯決賽週之後，一度有消息南韓有意接辦，原來南韓上一次辦亞洲杯決賽週，已經係1960年嘅事，去南韓睇亞洲杯，捧香港隊場，咁仲唔very good！？只可惜到最後主辦國仍然俾咗卡塔爾，5月去南韓棒香港隊場的好夢成空！

不過，睇唔成香港隊在亞洲杯比賽，又唔代表唔可以去南韓行下，距離上次去南韓都有五年，上次因為一啲原因所以喺一月去，結果落地當日就已經嚟一鑊零下十六度考一考中佬，雖然表面上零下十六度對我嚟本來係濕濕碎，但前題要有我當年嘅衣物！後來總算平安行咗幾日，不過始終受到溫度影響，行街或飲食都無咁方便，既然都領教過冬天，今次就嚟個初夏之行都唔錯！

.
機票：疫情前香港直航仁川嘅航班多得很，依家開放返之後，傳統航空公司已經恢復返唔少，而韓國嘅亷航仲未恢復，但係傳統航空公司又無坐地起價，反而中佬搵到喺二月底之前經T字頭網站買大韓來回仁川，比經大韓官網買再平兩舊水，埋單25XX，仲要係凌晨機，多出大半日在首爾行吓……抵！就咁決定

！
提起大韓航空，中佬對上一次搭佢數一數已經係33年前，不過嗰一次係長途機，由外國經韓國轉機返香港，不過嗰一次嘅經驗就認真麻麻，最深印象係中途在金浦機場本來轉機係2個鐘，結果delay下等咗4個鐘，最後攪到連下一班接駁嘅都miss埋......
當然已經係33年前嘅事，依家KE都應該有好大改善，而且今次只係短途直航，應該無咁多問題！

.
酒店：
由於中佬今次又係單拖出遊，加上自己都唔會花太多時間留喺酒店，所以都會以慳為前題，甚至太空艙旅館我都OK，不過當我上網搜尋之時，應該係文化問題，首爾似乎唔多興太空艙旅館，最近似嘅係一啲床位旅館。
另外一個問題就係今次住邊一區，好似去東京，以前自由行一定係住新宿，去到對上一次先改為住上野。五年前第一次首爾自由行，就揀咗住會賢站，貪佢喺正首爾同明洞之間，今次既然係睇波，都要研究吓各個球場位置，結果發現三個球場位於東西南，最方便嘅中間點仍然係首爾站。
之後又照舊，在Ex字頭網站搵，結果又被我搵到間都幾平嘅酒店單人房，住四晚平均唔需要三百一晚，雖然估計係黑房，不過最少有自己廁所同浴室，唔會差過床位。而呢間酒店最吸引中佬係佢嘅位置，正正會賢站上面！
唔駛諗，就咁決定！

.
行程：
其實難得今次老虎放人，當然係去一啲佢哋無興趣，唔會去嘅地方，首先係睇波，跟住就係38線非軍事地帶……咁樣行程上已經填滿嘅頭四日，至於最後一日，就係做一啲補漏性質，頭四日有咩未睇，未買，未食就留返呢大半日去做，就咁決定！

[ 本帖最後由十二月田猛臣於 2023-6-28 22:59 編輯 ]

#仁川 #酒店 #韓國 #首爾 #香港

回覆引用被引用(1) TOP

十二月田猛臣

VIP

帖子: 5631
積分: 5489
註冊: 2011-5-5

發短消息加為好友

#2

樓主發表於 2023-6-4 22:42

Day 1︰2023/05/18 (上)
.
今次旅程起點係大韓嘅凌晨機，收到返屋食飯沖涼，執齊行李就搭A巴士出機場，剛好2245就去到機場，好快就搵到KE嘅櫃台，不過雖然係凌晨機，但都應該唔少人，中佬都足足排咗十幾分鐘先至寄埋行李同出登機證，之後都係出境，搵閘口，之後搵個位上網，到咁上下就登機。

今日呢班機都算多人，不過就無爆晒，中佬被安排去機尾，中間位置，一個人可以坐晒三個位，一陣食完飛機餐應該有覺好瞓！

跟住都係正常步驟：起飛，派餐，至於機上娛樂就真候削咗啲，啲電影無乜興趣！今日飛機餐有兩款選擇，韓式拌飯同西式牛肉薯仔，咁中佬就擇咗韓式，點知空姐一派上嚟就覺得中伏，賣相唔吸引之餘，最慘係中佬唔點食先啱！？最後唯有將肉碎同菜蔬撈埋，再加白飯求其食咗佢！反而個麵豉湯就幾好飲！

食完有咩好做，成點幾喇，梗係瞓喇！點知今次係屬於單拖自由行，所以對所有嘢都要自負盈虧，成日會擔心有嘢帶漏，結果個人唔眼睏，最衰仲係今日呢程機經常遇到氣流，震過貓王點瞓呀？結果無辦法深層入睡之下，就到咗仁川機場！

依家仁川機場入境基本上同疫情前已差不多，只係多咗一項健康申報，可以出發前喺網上登記，之後韓國方面發一個叫Q Code嘅二維碼入境時do，現場填表亦可以，由於依家係韓國時間0520，所以其實分別唔大！
話咁快攞埋行李出咗海關都仲未夠0600，仁川機場已經有唔少人，一到0600即刻開返好多燈，而店舖亦都拉起閘開工。本來呢個時間可以食早餐，不過依家中佬未肚餓住，所以就改為去今日第一個行程！由於KE係用第二航廈，咁我首先就要由第二航廈搭穿梭巴士去第一航廈，等咗大概十分鐘左右，就上咗穿梭巴士，估唔到係由第二航廈去第一航廈原來係好鬼遠，搭呢一架穿梭巴士居然搭咗成廿幾分鐘，中途仲落大雨.......

最後終於到咗第一航廈，咁中佬嚟第一航廈有咩攪作呢？上一次嚟韓國之時，先知道原來韓國都試驗性質開咗一條磁浮鐵路，由仁川機場去龍游，雖然只係二十分鐘短路程，不過係免費，18年嗰一次錯過，今次就要試吓！

去到第一航站之後搵到指示牌，不過都要行差不多10分鐘先至搵到個車站，點知.......XYZ！停咗！！！

一見到個停止運行嘅牌，中佬真係既失望，又有多少憤怒！憤怒在於其實舊年7月14日，呢一條磁浮鐵路已經停運，但係出發前上網搜集資料，又唔發現有相關訊息！不幸中之大幸係仁川機場我來回韓國都會用到，唔算係專程跑過嚟，除咗花咗些少時間成本外，損失唔大！不過因為我預算搭呢條磁浮鐵路，一來一回加影相打卡都會用個幾鐘頭，依家無咗呢個項目，有啲唔知點攪，大早出去首爾亦未有酒店房可以check-in！

最後中佬搵個位坐低，開部電腦上網睇一陣新聞，點知愈睇愈眼瞓，最後決定都係出咗首爾先，於是我就搭返普通地鐵由仁川機場出首爾，上車之時仲有位坐，不過好快由仁川出首爾嘅上班族就塞滿車箱，中佬攬住件大行李，其實有啲唔好意思，呢個鐘數應該唔好用本地人逼，應該去搭機場快車！最後我都係頂唔順瞓著咗，其他上班族狀況都唔好得幾多，右手邊位阿姐瞓到昏迷，左手邊位小姐又瞓到個頭撼落中佬個膊頭好多次！

終於出到首爾，之後就轉4號線去會賢，7號出口有扶手梯上地面，一眼就望到酒店幢大廈，同台北啲平價酒店一樣，呢一類酒店都係開喺舊區舊式商業樓，好似我今次住呢一幢，入面有牙醫、醫生、化驗，甚至仲有教會，十分熱鬧！
10樓全層都係酒店，依家大概係0900左右，嚟到當然未有房俾我，門口有個「阿朱媽」招乎我，當然係雞同鴨講，不過呢個世界有google translate，一人一部手機各自講，阿朱媽大概意思係依家未有房，叫我1400後再嚟，佢仲俾咗今日check-in名單俾我睇，問我係邊一個！而我就同佢講將大件行李先放低，跟住阿朱媽仲指示我將件行李放去邊。之後中佬首先執一執啲行李，將喺飛機上用嘅用品放返入喼，再放埋部手提電腦放入去，鎖返好之後再同阿朱媽打個招乎，就正式開始今次首爾自由行！

由於酒店所在嗰幢大樓正正就喺退溪路，所以一出門口就係要諗「向左走向右走」？

當然選擇就係向左走去明洞！同上次零下十幾度唔同，今次覺得由會賢行去明洞非常之近，唔知係咪太早，街上行人唔多，見到Issac Toast已經有十幾個人排緊隊，不過唔知係咪唔夠瞓，噚晚食完個飛機餐到依家都唔肚餓，既然係咁就行吓喇！於是中佬就喺明洞行來行去，其實都唔係完全無目的，因為跟住幾日都會喺呢一頭搵食，睇定有咩好食，心目中會幫襯嘅首先係辣炒雞，之前食過嘅韓式粥品，網上仲有介紹過一間平價自助餐等等，結果中佬就利用呢一段時間搵咗幾間打算會幫襯嘅餐廳喺明洞嘅位置，呢一度午餐好多都係1100開始！

之後中佬就行咗去另一邊，沿住條大路行上去，係可以去到一個吊車站，呢度嘅吊車係可以上去南山塔，之前其實有旅行網站有介紹過，但上次嚟之時太凍，加上要睇住阿姨，於是改咗搭巴士上去南山塔！行到條路盡頭，呢度有一部幾有趣嘅電梯，你亦可以話佢係一部微型覽車，呢一部電梯，係可以帶行人上去半山嘅吊車站。

今日中佬其實就無打算上南山塔，一來上次已經上過去，今日上嚟吊車站八吓，其實都係志在拖吓時間！

拖時間為乜呢？因為中佬估計最快都要1300之後先有房，依家行行吓大概到1100左右，咁我就可以去食午餐，搵個地方hea吓！由於今朝連早餐都無食，所以早少少食午餐，今餐中佬就決定去一間名叫Qoo Xoo壽司Buffet嘅食自助餐，老老實實，呢一間本身唔係高檔嘅自助餐，中佬亦再唔係年輕時可以喪食嘅年代，不過食呢間有一樣嘢，因為佢有上網，雖然有限時但有90分鐘，我可以坐到1245，再加上有湯，有主食，有飲品，有甜品，價錢係20900圜一位，呢個價錢當係俾個位我坐到酒店有房都唔貴，何況仲有飲有食！

呢間自助餐喺韓國都係平價自助餐，食午餐時間有會有上班族幫襯，我今日到場時大概係1115，點知已經有唔少食客食緊！咁早！？是但喇！正正就係今日比較早，一入去就有位唔駛等！

食自助餐最大嘅方便就係唔駛點餐，去到言語唔通嘅地方，就有呢個方便！咁呢間Qoo Xoo壽司食咩呢？當然係壽司為主，不過湯、沙律、熟食、主食(飯麵)、甜品、飲品，通通都有！其他我就唔多講，因為都大同小異，不過值得講一講係佢哋壽司，因為同香港或日本食到嘅壽司有啲唔同？佢係屬於用料比較平嘅壽司，平常日式壽司係會比較注重食材嘅原味，而呢間壽司係會用比較多醬汁去調味，而且食材方面，除咗本身多見嘅三文魚，吞拿魚之外，仲會有其他比較有趣嘅口味，中佬個人最欣賞係煙肉壽司！雖然聽落好似有啲伏，令人想起當年明將壽司，不過呢度肯定係一個好味版！

除咗甜辣雞塊有啲太辣，之外食物味道都唔錯，加上選擇自由度大，雖然今日因為唔夠瞓之下，未可以食到捧住個肚！另外兩款中佬推薦嘅係主食卡邦尼意粉，同埋甜品Tiramisu，全部都再攞多一次。至於其他到你哋有機會去到之時自己再發掘！

一邊食一邊上網睇片，好快又夠90分鐘，出面亦都排晒隊，係時間俾返張檯人哋做下一轉！落樓之後喺明洞再行個圈，之後就返去會賢酒店店睇下有房未。返到去酒店，阿朱媽見到我，跟手就俾埋鎖匙我，而我件行李已經放咗入房！咁平價錢當然係「黑房」，不過對於中佬「早出晚歸」嘅作風，每日只係得幾個鐘喺房，要5星級酒店房都無用，有位放行李同沖涼就可以！不過間房真係好窄，無檯俾我打開台電腦，最後唯有放上床覆訊息！

攪攪吓攤一陣，又已經過咗1500，呢個時間突然諗起，第二朝0700喺明洞集合，但首爾唔同香港(或者我唔熟路)，0600唔知邊度有早餐食，明洞間老麥都唔係24小時，再加上跟住嘅行程去嘅區域以前係未去過，亦都唔知今晚會幾點返到明洞，於是我就要先買定第二朝早餐，會賢呢頭當然有麵包店，不過最後中佬都係行返落明洞間Paris Baguette度買定麵包，買完當然就先返酒店放低，大概1600左右就正式出發去下午唯一嘅行程。

.
つづく......
.
* 中佬打打吓，未打完Day 1已經覺得太長，決定分兩段出！

[ 本帖最後由十二月田猛臣於 2023-6-5 21:21 編輯 ]

回覆引用被引用(1) TOP

米奇老鼠小姐一星級會員帖子 118 積分 122 註冊 2022-10-11 發短消息加為好友	#3 發表於 2023-6-5 00:08 只看該作者大中小繁簡好details 嘅遊記，等追
UID 7248862 帖子 118 精華 0 積分 122 金幣 667 閱讀權限 20 在線時間 326 小時註冊 2022-10-11 最後登錄 2024-9-16 查看詳細資料	回覆引用 TOP

401

Golden Member

帖子: 27198
積分: 23871
註冊: 2007-11-15

發短消息加為好友

#4

發表於 2023-6-5 09:42

引用:

原帖由 十二月田猛臣 於 2023-6-4 22:41 發表

前言/廢話︰
一個疫情，大部份人都無機會外出，到年頭終於開關，中佬望一望本Passport，仲有一年就到期，即係實際可用得返半年多少少。自從中國放棄咗主辦2023亞洲杯決賽週之後，一度有消息南韓有意接辦，原來南韓上一次辦亞洲杯決賽週，已經係1960年嘅事，去南韓睇亞洲杯，捧香港隊場，咁仲唔very good！？只可惜到最後主辦國仍然俾咗卡塔爾，5月去南韓棒香港隊場的好夢成空！
不過，睇唔 ...

多謝分享
大韓和韓亞的服務唔錯架, 伴飯係必食, 記得加夠伴飯醬和麻油

回覆引用被引用(1) TOP

Ylov 尊貴會員帖子 2302 積分 2302 註冊 2010-8-23 發短消息加為好友	#5 發表於 2023-6-5 11:36 只看該作者大中小繁簡 [按此打開] [隱藏] 引用: 原帖由 401 於 2023-6-5 09:42 發表多謝分享大韓和韓亞的服務唔錯架, 伴飯係必食, 記得加夠伴飯醬和麻油好懷念當年A380,坐上層超正，拌飯係得獎嘅，但我地都覺得麻麻😅
UID 4266748 帖子 2302 精華 0 積分 2302 金幣 859 閱讀權限 50 在線時間 3133 小時註冊 2010-8-23 最後登錄 2024-9-16 查看詳細資料	回覆引用被引用(1) TOP

401

Golden Member

帖子: 27198
積分: 23871
註冊: 2007-11-15

發短消息加為好友

#6

發表於 2023-6-5 14:13

引用:

原帖由 Ylov 於 2023-6-5 11:36 發表

好懷念當年A380,坐上層超正，拌飯係得獎嘅，但我地都覺得麻麻😅

A380上層正呀, 只坐過一次樓上, 另外都只是樓下, 唔知之後航班多番, 會唔會再出動呢

伴飯熱辛辣辣用鍋上會好食D, 冷的打節扣

[ 本帖最後由 401 於 2023-6-5 14:14 編輯 ]

回覆引用被引用(1) TOP

十二月田猛臣

VIP

帖子: 5631
積分: 5489
註冊: 2011-5-5

發短消息加為好友

#7

樓主發表於 2023-6-5 22:57

Day 1 (下)
.
由會賢出發，先搭4號線去首爾，之後再轉1號線，目的地係九一站，落車之後根據指示牌方向出閘，好快就望到我要去嘅地方——高尺Sky Dome！

高尺Sky Dome係一個棒球場，係全亞洲除日本以外唯一一個圓頂巨蛋棒球場，目前作為韓國職業棒球聯賽，上一季總亞軍球隊Kiwoom Heroes的主場！據講呢一個球場興建過程都有啲騎呢，雖然本來呢個位都係會起棒球場，不過最初設計係一個比業餘比賽級別嘅球場，但後來不斷修改設計同加budget，竟然起咗全韓國第一個同目前唯一一個圓頂棒球場！而個名仲攪笑，高尺是地方名，無問題！但係Sky Dome呢個名就同加拿大多倫多棒球場撞名，雖然依家Toronto Sky Dome被冠名成為Roger Center，但當初之所以名為Sky Dome，係因為當年呢個球場係全世界最先進嘅多功能體育館，可以打棒球、美式足球以外，仲有演唱會，時至今日呢個球場仍然係罕有，因為佢個圓頂係可以打開，二十多年前中佬亦曾喺呢個球場睇過比賽，當日好天，開咗圓頂係一個開放式棒球場！

高尺Sky Dome根據資料顯示，圓頂係固定，唔可以打開，Dome就係Dome，不過何來Sky呢？而且一般圓頂球場規模都唔會大細，以MLB為例，最少都5~6萬位起跳，而日本最細嘅圓頂棒球場係西武Lions嘅Belluna Dome，都有超過3萬位，更加唔好講Tokyo Dome 同Kyocera Dome Osaka呢一類5萬位以上嘅圓頂棒球場！但係高尺Sky Dome只係有1萬7千位！所以有傳聞當年係為咗搶先於台北大巨蛋之前落成，所以夾硬將一個業餘級棒球場改為圓頂巨蛋！甚至起好之後，首爾三支職棒都無興趣搬入去做主場，最後只有Heroes隊以一個日租形式優惠價格進駐做主場！

去到之時距離開波仲有個半鐘，但感覺好似有啲冷清，Box Office前買飛嘅人唔多，係咪因為係星期四開1830呢？而中佬望住個純韓文嘅價格表，一頭霧水，加上已經超過24小時無瞓過一覺好嘅，判斷力已經下降，最後行到窗口講︰9000 Won ticket, Outfield, Upper Deck！

之後就俾錢出飛......張飛係反傳統打直印......設計又幾「靚仔」！

買完飛仲有個半鐘先開波，咁中佬就照自傳統，繞住高尺Sky Dome外圍行一個圈，其實高尺Sky Dome佔地範圍真係唔大，中佬只係用十零分鐘就已經繞外圍行咗一圈。由於場內外野同內野觀眾席係無一條正式通道，所以外內嘢入場口都係分開，入場時都係要安檢，中佬今日有帶一個環保水樽，工作人員都無話唔俾入！

之後我就開始搵返我自己個位，入場之後位置係外野二樓，而我買嘅upper deck即係三樓，不過唔知係咪時間尚早，三樓真係人影都唔多隻，好快就搵到自己個位。其實中佬今日揀睇外野，其實係有兩個原因，第一個原因係因為外野票價係比較平啲，好似今日呢張飛，9000圜，港超都睇唔到！第二個原因係中佬希望今日可以執到一粒全壘打波，不過坐定之後，就發覺自己好似有啲戇X，因為即使打到全壘打，個波可以飛到上三樓嘅機真係唔高！唯一希望係因為三樓無乜人，如果真係有全壘打波飛到上三樓，中佬搶到嘅機仲係有嘅！

當我岳高頭睇高尺Sky Dome，呢一個場又同以前中佬去過嘅圓頂棒球場唔同，或者可以講，Tokyo Dome係三十幾年前嘅產物，當時世界上呢一類球場，都係用人工氣壓差異，令到個上蓋可以昇起！而高尺Sky Dome已經唔係再用氣壓差異呢一種方法，而係直接用鋼材頂起成個屋頂。

由於距離開波仲有成個鐘，加上室內，中佬又攰，等等下真係有啲恰眼瞓！大鑊，好彩高尺Sky Dome內有wifi，上網睇吓片。到咗1815，距離開波仲有15分鐘，三樓仍然人都唔多，中佬感覺非常奇怪，不過考慮到一陣場波最少有兩個半鐘，雖然午餐食自助餐，依家唔太肚餓，不過棒球比賽攻守交換只係得兩分鐘，買唔切食品，於是中佬都走去買嘢食！選擇方面就無台灣桃園棒球場咁多，不過一般可以填肚嘅炸雞、Pizza都係有，而中佬就買咗隻熱狗，睇棒球，配熱狗，而更加估唔到，呢一隻6000圜嘅熱狗，又幾好味！

食完又夠鐘開波，同日本一樣，開波前都會奏國歌，奏完之後望一望，三樓仍然無乜人，只可講句世界艱難(賽後KBO官方公佈︰入場人數為5742人)！由於近期中佬公私兩忙，所以無乜時間做功課，所以對於KBO同NPB或CPLB有咩唔同，一概唔知！今日呢場波客隊係另一支以首爾為根據地嘅Doosan Bears，明副其實嘅「首爾打比戰」，原來KBO客隊球迷打氣區，係設喺三壘左右嘅位置，由於Doosan Bears都係首爾球隊，所以過嚟捧場嘅客隊球迷都唔少，一開波之時，Doosan Bears球迷聲浪由右至左咁蓋過去，而Kiwoom Heroes嘅球迷亦不甘示弱，好快就「還拖」，中佬位於外野三樓，完全感受到兩邊聲浪比拚，有啲似武俠小說中高手過招！

開波後會係主隊先守，今日Kiwoom Heroes先發投手係41號，中佬前幾日忙到嘔，無睇先發日程表，於是攞部手機出嚟睇吓41號係乜水，唔睇由自可，一睇嚇一跳，原來今日Kiwoom Heroes先發投手係安佑鎮，呢一位年青投手係近幾季KBO冒起嘅新星，投球速可以去到160km/h，甚至有球探認為佢有資格挑戰MLB，但係中佬聽到佢個名之時驚訝其實唔係在於佢有幾犀利，而係因為佢一啲負面新聞，原來安佑鎮高中時期少不更事，好學唔學學人攪校園霸凌恰一個師弟，到佢成名之後，當事人爆佢大鑊，結果佢俾KBO同Kiwoom Heroes罰停賽反省，雖然之後佢已經同當事人達成和解，但係韓國社會就唔係咁睇，今年三月世界棒球經典賽中，KBO基於社會輿論壓力，將安佑鎮排出國家隊名單外......其實都幾好笑！自己球員少年時代犯錯，將佢排出國家隊外，結果係令同組澳洲得益，究竟你係罰安佑鎮，定係玩死自己，真係難講！由於我係二月尾買機票，當時只係度好Kiwoom Heroes今日主場有比賽，所以今日中佬居然遇上呢位爭議人物首發，真係Lucky！

如果大家對棒球賽無興趣，可以skip咗以下︰
---------------------------------------------------------------------------------------------------
第一局上︰Doosan Bears就反客為主，趁機打咗安打領先1分，而且呢一局幾位擊球手都相當難纏，不停foul波，咁攪法安佑鎮可能好快就要收工。
第一局下，Kiwoom Heroes立即反攻，結果佢哋嘅擊球手同樣難纏，又係不停foul波，更加反cup領先2:1！而中佬呢個時間亦大叫自己seven咗，因為原來KBO的主場球迷區係設喺一壘位置，除咗氣氛好之外，最緊要係可以近距離見到啦啦隊員！最好笑仲係當客隊被K之時，啦啦隊會跳一隻舞......買錯位呀！！！！今場波係由一個男隊長帶領四位女仔啦啦隊員領導打氣，當然就無台灣咁疊馬！
第二局上下︰之後兩隊投手都似乎安定落嚟，但係foul波仍然好多，場波拖到好慢，當時中佬擔係場波打得咁慢，一陣打到2300後，都唔知仲有無地鐵返會賢，而且我第二朝又要早起！
第三局下︰仍然係打好耐，Kiwoom Heroes把握機會再添一分領先3:1。
第四局上下︰本來呢一局兩隊都無得分，但係就發生咗一件怪事，當中佬睇睇吓波之時，突然間發現在坐椅下面有一個棒球！攞起手睇睇，上面印住KBO嘅標誌，應該係一個正式嘅KBO比賽用棒球，但係今場波至今未有全壘打，個波係點上嚟三樓看台呢？由於個波有啲舊，中佬估係今日賽前打擊練習之時俾一位大神打咗上三樓！不過最邪嘅係由賽前到第四局我都係坐同一個位，點解之前見唔到，可能真係24小時無正式瞓過嘅影響，Anyway中佬都將呢個KBO波帶埋返香港！亦都係我自幼稚園時代睇日本黑白電視劇「棒球怪傑」接觸棒球以來，第一次執到一個正式比賽用棒球。
除此之外，我發現KBO啲啦啦隊無台灣咁搏命，第三局開始就會轉流休息。
第五局上︰Doosan Bears來勢凶凶，一上場居然連續三個打席都安打，不單止追返成2:3，仲形成1，3壘有人，無人出局！點知原來呢位安佑鎮都唔係浪得虛名，面對如此惡劣狀況，佢立即以連續三次三振將Doosan Bears三位擊球手全掃出局。如果以中佬睇棒球嘅經驗，呢三個三振直接將Doosan Bears打懵，因為當時好多球迷包括中佬在內都覺得Doosan Bears有機會打退安佑鎮同反cup！
第五局下︰Kiwoom Heroes都有安打，但最後都係無功而還，雖然Kiwoom Heroes表面上好似有優勢，但始終都拉唔開，領先1分棒球嚟一棍就翻盤......
第六至八局上︰呢幾局有啲膠著，首先係Doosan Bears喺5局上大好形勢之下俾安佑鎮3K打窒條氣，之後三局都未能形成有效連貫嘅攻勢。而安佑鎮喺投滿6局之後，亦以7K嘅成績功成身退，其後兩居中繼投手亦都力保不失！
而經過休息之後，四位啦啦隊女隊員又重新集齊上返舞台繼續打氣！
第八局下︰呢一局Kiwoom Heroes終於喺攻勢上成功串連到，一口氣連攞4分，比數改寫為7:2，攞咗呢4分之後，場波大局都已經定，只要唔大出錯，Kiwoom Heroes勝出機會好高！
第九局上︰雖然落後5分，但Doosan Bears仍然試圖力追，亦都成功俾佢哋追返1分，但最後都係無力翻盤，全場完Kiwoom Heroes以7:3擊敗Doosan Bears！

---------------------------------------------------------------------------------------------------
雖然話高尺Sky Dome內外野場內係唔通，不過其實係有一條狹窄嘅通道可以由外野位置行去內野！似乎完場之後，工作人員亦都無執得咁緊，於是中佬就把握機會落下層，再穿過條窄通道去咗一壘對出觀眾席，呢個時間做緊賽後球員訪問，只可惜今日最佳球員唔係投出7K嘅安佑鎮！
當然中佬專程跑過嚟呢一邊，就係為咗近距離睇啦啦隊成員，只可惜佢哋都忙住同fans合照，無企定俾中佬影相！

今日場波打得比較耐，超過三個半鐘頭(KBO公佈正式時間為3:39)，再睇埋啦啦隊同賽後訪問，已經差不多2300，急急腳離開高尺Sky Dome，返去九一搭地鐵返會賢，由於明早要0700到明洞跟本地團，依家都想盡快返酒店休息，點知人算不如天算，就喺呢個時間出錯，可能因為超過24小時無正式瞓一覺好嘅，搭1號線返歸之時，居然唔記得落車，去到市政廳先落車，想搭返轉頭又唔得，最後既然都要出閘，不如就行返去，反正5年前都行過，順便睇吓有無宵夜可以買返酒店。不過2300後嘅市政廳同會賢真係靜過鬼，最後兩手空空返酒店，瞓返覺先，其他嘢都唔好理住。

[ 本帖最後由十二月田猛臣於 2023-6-11 08:14 編輯 ]

回覆引用被引用(1) TOP

401 Golden Member 帖子 27198 積分 23871 註冊 2007-11-15 發短消息加為好友	#8 發表於 2023-6-6 09:45 只看該作者大中小繁簡引用: 原帖由十二月田猛臣於 2023-6-5 22:57 發表 Day 1 (下) . 由會賢出發，先搭4號線去首爾，之後再轉1號線，目的地係九一站，落車之後根據指示牌方向出閘，好快就望到我要去嘅地方——高尺Sky Dome！ ... 勁過旁述, 可惜我唔識睇波, 幸好最尾有彩蛋
UID 2808683 帖子 27198 精華 0 積分 23871 金幣 2249 閱讀權限 80 在線時間 4676 小時註冊 2007-11-15 最後登錄 2024-6-3 查看詳細資料	回覆引用被引用(1) TOP

iou008	#9 提示: 該帖被管理員或版主屏蔽
iou008 Silver Member 帖子 15567 積分 15489 註冊 2013-10-19	#9 發表於 2023-6-6 10:11 只看該作者大中小繁簡提示: 違規內容已被屏蔽
UID 5286622 帖子 15567 精華 0 積分 15489 金幣 5327 閱讀權限 70 在線時間 8269 小時註冊 2013-10-19 最後登錄 2024-9-16 查看詳細資料

藍西

尊貴會員

帖子: 1796
積分: 1915
註冊: 2014-10-21

發短消息加為好友

#10

發表於 2023-6-6 13:57

[隱藏]

引用:

原帖由 401 於 5-6-2023 14:13 發表

A380上層正呀, 只坐過一次樓上, 另外都只是樓下, 唔知之後航班多番, 會唔會再出動呢
伴飯熱辛辣辣用鍋上會好食D, 冷的打節扣

我搭過一次韓亞A380上層, 由仁川回程香港, 座位闊落舒服, 但之後韓亞調左A380去飛其他航線

回覆引用被引用(1) TOP

藍西

尊貴會員

帖子: 1796
積分: 1915
註冊: 2014-10-21

發短消息加為好友

#11

發表於 2023-6-6 14:00

引用:

原帖由 十二月田猛臣 於 4-6-2023 22:42 發表

Day 1︰2023/05/18 (上)
.
今次旅程起點係大韓嘅凌晨機，收到返屋食飯沖涼，執齊行李就搭A巴士出機場，剛好2245就去到機場，好快就搵到KE嘅櫃台，不過雖然係凌晨機，但都應該唔少人，中佬都足足排咗十幾分鐘先至寄埋行李同出登機證，之後都係出境，搵閘口，之後搵個位上網，到咁上下就登機。
今日呢班機都算多人，不過就無爆晒，中佬被安排去機尾，中間位置，一個人 ...

搭過幾次凌晨機, 就算唔係遇氣流都瞓唔到, 試過坐窗口位或走廊位都瞓唔到

回覆引用被引用(1) TOP

401

Golden Member

帖子: 27198
積分: 23871
註冊: 2007-11-15

發短消息加為好友

#12

發表於 2023-6-6 17:03

引用:

原帖由藍西於 2023-6-6 13:57 發表

我搭過一次韓亞A380上層, 由仁川回程香港, 座位闊落舒服, 但之後韓亞調左A380去飛其他航線

家下有多些班次已經好開心, 無揀坐咩機了
零晨機時間好用, 不過到埗要補眠一兩粒鐘先番生, 但最近的住宿貴咗, 唔似得疫情前咁訂多晚, 揀日間機算了

回覆引用被引用(1) TOP

十二月田猛臣 VIP 帖子 5631 積分 5489 註冊 2011-5-5 發短消息加為好友	#13 樓主發表於 2023-6-6 20:52 只看該作者大中小繁簡引用: 原帖由 401 於 2023-6-6 09:45 發表勁過旁述, 可惜我唔識睇波, 幸好最尾有彩蛋中佬可能係一個比IT耽誤嘅請波佬
UID 4518886 帖子 5631 精華 0 積分 5489 金幣 8178 閱讀權限 60 在線時間 8612 小時註冊 2011-5-5 最後登錄 2024-9-16 查看詳細資料	回覆引用 TOP

十二月田猛臣

VIP

帖子: 5631
積分: 5489
註冊: 2011-5-5

發短消息加為好友

#14

樓主發表於 2023-6-6 20:56

引用:

原帖由藍西於 2023-6-6 14:00 發表

搭過幾次凌晨機, 就算唔係遇氣流都瞓唔到, 試過坐窗口位或走廊位都瞓唔到

我發現個問題︰
如果搭凌晨機係跟團，或者落地之後有親戚搭機，個人夠放鬆就會好好瞓。

但如果好似呢一次咁單拖自由行，成日擔心唔知有無帶漏嘢，就會好難瞓

回覆引用被引用(1) TOP

企鵝家二星級會員帖子 312 積分 273 註冊 2017-1-7 發短消息加為好友	#15 發表於 2023-6-7 14:02 只看該作者大中小繁簡 [按此打開] [隱藏] 好精彩嘅遊記分享感受到有幾開心
UID 6048002 帖子 312 精華 0 積分 273 金幣 426 閱讀權限 30 在線時間 64 小時註冊 2017-1-7 最後登錄 2024-5-20 查看詳細資料	回覆引用 TOP

引用:

引用:

引用:

引用:

引用:

引用:

引用:

引用:

引用:

關於我們

使用條款及免責聲明

私隱政策

移除政策

聯絡我們

會員功能

升級Discuss Plus

註冊成為會員

常見問題

客服支援

總版規

純文字版本

合作

廣告中心

廣告查詢

合作方案

推介

編緝精選

建議追蹤

最新留言

iChoice網絡至強人氣大獎

追蹤我們